بيىلعى جىلدان باستاپ تۇرعىسىن اۋىلدىق وكرۋگىندە بالىق شارۋاشىلىعى قولعا الىنىپ، بوگەتكە 2 مىڭعا جۋىق سازان مەن اق امۋر شاباقتارى جىبەرىلدى. كەلەر جىلى بوگەتتىڭ ماڭىنا جاڭا دەمالىس بازاسى سالىنىپ، كەلۋشى تۋريستەر دەمالىپ قانا قويماي، سپورتتىق بالىق اۋلاۋمەن اينالىسا الادى.
سپورتتىق بالىق اۋلاۋ مەن ءتۋريزمدى ۇيلەستىرۋدى جوسپارلاپ وتىرعان شارۋاشىلىق قوجايىنى ونەجا بۋرمىشيەۆانىڭ ايتۋىنشا، كۇرشىم اۋدانىنان ساتىپ الىنعان شاباقتار بوگەتتىڭ سۋىنا بىردەن بەيىمدەلگەن.
– كەلەر جىلى وسى جەرگە تۋريستەرگە ارنالعان ۇيلەر سالىپ، ماڭايدى اباتتاندىرۋدى جوسپارلاپ وتىرمىن. كەلۋشى تۋريستەر تازا اۋادا سەرگىپ قانا قويماي، اقىلى تۇردە بالىق اۋلاپ، ۋاقىتتارىن قىزىقتى وزكىزە الادى، – دەدى شارۋاشىلىق قوجايىنى ونەجا بۋرمىشيەۆا.
ءقازىردىڭ وزىندە زىريان اۋدانىندا بالىق شارۋاشىلىعى قارقىندى دامىپ، تاعى ءۇش بوگەتتە بالىقتار وسىرىلۋدە. تەك ودان شىققان بالىقتار بالىق وڭدەۋشى سەحكە جىبەرىلىپ وتىرادى. اۋداندىق اۋىل شارۋاشىلىعى بولىمىندە ءمالىم ەتكەندەي، الداعى ۋاقىتتا تاعى بىرنەشە بوگەتكە بالىق جىبەرىلىپ، ءونىم كولەمى ۇلعايتىلىپ، زىريان اۋدانى ءوزىن-وزى بالىق ونىمدەرىمەن قامتاماسىز ەتپەك.
