وسكەمەندە د.سەرىكبايەۆ اتىنداعى جوعارى تەحنيكالىق كوللەدج اشىلدى. جاستارعا جوعارى تەحنيكالىق ءبىلىم الۋعا مۇمكىندىك بەرەتىن بۇل وقۋ ورنىنا توعىزىنشى سىنىپتى بىتىرگەن جانە ورتا مەكتەپتىڭ تۇلەكتەرى قابىلدانىپ، ون ءۇش ماماندىق بويىنشا وقىتىلادى، دەپ جازادى وبلىستىق «ديدار» گازەتى.
ولاردىڭ بارلىعى - وبلىسىمىزدىڭ كاسىپورىندارىنا اۋاداي قاجەت ماماندىقتار. بۇگىنگى تاڭدا ديزاين، مەتاللۋرگ، مەحانيكالىق وڭدەۋ، ولشەۋ-باقىلاۋ اسپاپتارى جانە ماشينا جاساۋ تەحنولوگيالارى، قۇرىلىس، جول ماشينالارى جانە جابدىقتاردى تەحنيكالىق پايدالانۋ، اۆتوماتتاندىرۋ جانە باسقارۋ، تاعى باسقا ماماندىقتارعا وبلىس ونەركاسىبى ءزارۋ بولىپ وتىر.
كوللەدج ماماندىقتارى د.سەرىكبايەۆ شقمتۋ-دىڭ فاكۋلتەتتەرىنە بەكىتىلگەن. ستۋدەنتتەر ۋنيۆەرسيتەتتىڭ باس عيماراتىندا وقيدى. ءسويتىپ، «كوللەدج - جوعارى وقۋ ورنى» تاجىريبە وقۋدىڭ العاشقى كۇنىنەن باستالادى. كوللەدج ستۋدەنتتەرىنە عىلىم دوكتورلارى مەن كانديداتتارى، رhD دوكتورلارى مەن ماگيسترلەر ساباق بەرەدى.
كوللەدج ۋنيۆەرسيتەتتىڭ قۇرىلىمدىق ءبولىمى بولعاندىقتان ونىڭ تۇلەكتەرى جەدەلدەتىلگەن باعدارلامامەن ۋنيۆەرسيتەتتە وقي الادى جانە ءۇش جىلدا جوعارى ءبىلىمدى ينجەنەر بولادى. ال باكالاۆرياتتان سوڭ ماگيستراتۋراعا، سونان كەيىن دوكتورانتۋراعا تۇسۋىنە مۇمكىندىك بار.
«تۇلەكتەردىڭ باسەكەدە باسىمدىعى جوعارى بولادى. ماماندار تەحنيكالىق ماماندىقتار بويىنشا دايارلانادى. ايماقتىڭ ماماندارعا دەگەن سۇرانىسىن ەسكەرىپ، ءبىز ۋاقىت تالاپتارىنا ساي جۇمىس ىستەۋدەمىز. سوندىقتان تۇلەكتەردىڭ جۇمىسقا ورنالاسۋىنا قيىندىق بولمايدى. ەكىنشىدەن، شقمتۋ-دىڭ ماتەريالدىق-تەحنيكالىق بازاسى قۋاتتى، مۇندا زاماناۋي زەرتحانالار مەن شەبەرحانالار جەتەرلىك. «ىرگەتاس»، FESTO سياقتى زەرتحانالاردىڭ وزدەرى نەگە تۇرادى. ستۋدەنتتەر «قازسينك»، «تمك»، «ماشزاۆود» سياقتى ءىرى كاسىپورىنداردا تاجىريبەدەن وتەدى»، - دەيدى د.سەرىكبايەۆ اتىنداعى شقمتۋ-دىڭ پرورەكتورى ن.لينوك.
كوللەدجگە قابىلدانعان قالادان تىس جەردەن كەلگەن ستۋدەنتتەرگە جاتاقحانادان ورىن بەرىلەدى. ۋنيۆەرسيتەتتىڭ كىتاپحاناسى - باي، سپورتپەن، كوركەم ونەرمەن اينالىسۋشىلارعا بارلىق جاعداي جاسالعان. ايتا كەتەتىن ءبىر ماسەلە - وقۋ اقىسى. كۇندىز وقيتىن ستۋدەنتتەر ءۇشىن جىلدىق اقى 195 مىڭ، ال سىرتتاي وقيتىندارعا - 140 مىڭ تەڭگە.
