شىعىس قازاقستان وبلىسى قوعامدىق كەڭەسىنىڭ دەنساۋلىق ساقتاۋ بويىنشا ساراپتاۋ جۇمىس توبى ايماقتاعى مەديسينا مەكەمەلەرىن، سونىڭ ىشىندە وڭالتۋ ورتالىعىنىڭ جۇمىسىن تەكسەرىپ، ءوز وتىرىسىندا وبلىستاعى دەنساۋلىق ساقتاۋ ماسەلەلەرىن تالقىلادى. ۇسىنىستار مەن ۇسىنىمدار ازىرلەنگەن سوڭ، ولاردى شقو قوعامدىق كەڭەسىنە جىبەردى، - دەپ حابارلايدى Qamshy.kz قازاقپاراتقا سىلتەمە جاساپ.

ايماقتاعى مەديسينالىق مەكەمەلەردى ساراپشىلاردىڭ ارالاپ شىعۋى ناتيجەسىندە مىنا جايتتار بەلگىلى بولدى: №4 قالالىق اۋرۋحانا جاڭا قۇرال-جابدىققا ءزارۋ، ال وسكەمەننىڭ جەدەل مەديسينالىق كومەك ستانسيالارىنىڭ اۆتوپاركىن جاڭارتۋ كەرەك، سەبەبى 13 رەانيموبيلدىڭ التاۋى جۇمىسقا جارامسىز.

پاسيەنتتەردەن ەڭ كوپ شاعىم تۇسكەن وبلىستىق وڭالتۋ ورتالىعىنا ساراپشىلار ەش جوسپارسىز باردى.

«نىسان بارلىق قاجەتتى قۇرالدارمەن جابدىقتالعان، شتات تا تولىق جاساقتالعان، - دەيدى شقو قوعامدىق كەڭەسى دەنساۋلىق ساقتاۋ بويىنشا ساراپتاۋ جۇمىس توبىنىڭ ءتورايىمى  تاتيانا چەرنىشوۆا. - ءبىراق، ءبىرقاتار ماسەلەلەر بار ەكەن. جاڭبىر سۋىن اعىزاتىن كاناليزاسيانىڭ دۇرىس قۇرىلماۋىنان ليفت شاحتاسىن ۇنەمى سۋ باسادى. سول سەبەپتى، وڭالتۋ ورتالىعىنا اسا قاجەت ليفتىلەر ءقازىر ىستەمەي تۇر.

عيمارات شاتىرىنان سۋ اعادى. جەرتولە قاباتى ساپاسىز جاسالعان. ونداعى ىلعالدىڭ كوپتىگىنەن زەڭ پايدا بولعان. ەم ۆاننالارى تولىق قۋاتىمەن جۇمىس ىستەمەيدى، سەبەبى وعان سۋ دۇرىس بەرىلمەيدى، ساپاسى دا سىن كوتەرمەيدى. مۇنداي جاعدايدا ەم قابىلداۋدىڭ ءوزى مۇمكىن ەمەس.

جىلۋ تورابى رەتتەلمەگەندىكتەن، جىلۋ شىعىنى ەسەپتە كورسەتىلگەن شامادان اسىپ كەتكەن. دۋش بولمەلەرىندە ەدەنگە بەكىتىلمەگەن تايعاناق توسەنىشتەر قويىلعان. تۇتقالارى جوق. وسى كەمشىلىكتىڭ ءبارىن عيمراتتى تۇرعىزعان قۇرىلىسشىلار جونگە كەلتىرۋى ءتيىس».

وبلىستىق انا مەن بالا ورتالىعىنىڭ ديرەكتورى سەرگەي پوپوۆ قىمبات ەم تۇرلەرىنە جەڭىلدىكتەردىڭ پاسيەنت كۇتە الاتىن اۋرۋ تۇرلەرىنە (بۋىن، كوز اۋرۋلارى) عانا بولىنەتىنىن ايتتى. كارديولوگيالىق وتالار جاساۋدىڭ ءجونى بولەك. ولار ەش شەكتەۋسىز جاسالا بەرەدى جانە ءقازىر ەشقانداي كەزەك جوق. سونداي-اق، قازاقستاندا كورسەتىلمەيتىن مەديسينالىق قىزمەت تۇرلەرىنە دە جەڭىلدىكتەر بار، بۇل جاعدايدا پاسيەنتتەر شەتەلگە ەم الۋعا بارادى. الايدى ءقازىر باسقا ءادىس قولدانىلۋدا.

«ءبىزدىڭ كلينيكالار بارلىق قاجەتتى قۇرالدار بار، تەك قاجەتتى ءبىلىم مەن قابىلەت جەتپەي جاتىر. پاسيەنتتەردى شەتەلگە شىعارعاننان، شەتەلدىك مامانداردى قازاقستانعا شاقىرۋ جانە وتاندىق مامانداردى وقىتۋ الدەقايدا ارزانىراق. سوندىقتان، ءبىز شەتەلدىك مامانداردى كوپتەپ شاقىرىپ، پاسيەنتتەردى وسىندا ەمدەپ جاتىرمىز. وسىلايشا، وتاندىق دارىگەرلەر تاجىريبە جيناقتاۋدا، ال ءبىز شەبەرلىك ساعاتتارى كەزىندە بىرنەشە پاسيەنتتەرىمىزدى ەمدەپ الۋعا تىرىسامىز»، - دەدى وبلىستىق انا مەن بالا ورتالىعىنىڭ ديرەكتورى سەرگەي پوپوۆ.

«100 ناقتى قادام» ۇلت جوسپارىنداعى 5 پرەزيدەنتتىك رەفورمانىڭ بەسىنشى تاپسىرماسى - حالىققا ەسەپ بەرەتىن ۇكىمەتتى قالىپتاستىرۋ. بۇگىندە ايماق بويىنشا جەرگىلىكتى اتقارۋ ورگاندارى جانىندا 20 قوعامدىق كەڭەس جۇمىس ىستەيدى.