«قازاتومونەركاسىپ» ۇاك» اق ەنشىلەس كاسىپورىنى «ءۇلبى مەتاللۋرگيا زاۋىتى» اق «ءۇلبى دەمالىس بازاسى» ءجشس-نىڭ 100% قاتىسۋ ۇلەسىن ساتۋعا شىعاردى.

كومپانيانىڭ قوعاممەن بايلانىس دەپارتامەنتىنىڭ حابارلاۋىنشا، «ءۇلبى دەمالىس بازاسى» ج ش س قاراماعىنا وسكەمەن قالاسىنان 75 شاقىرىم قاشىقتىقتا، شىعىس قازاقستان وبلىسىنداعى «ءتورت-قارا» كولىنىڭ جاعالاۋىندا ورنالاسقان «سيبينى» دەمالىس بازاسى جاتادى. كاسىپورىن دەمالىس ۇيىمداستىرۋ، مادەني-ساۋىقتىرۋ شارالارىن وتكىزۋمەن شۇعىلدانادى.    

اتالعان نىساندى ساۋدالاۋ باعا كوتەرۋ ءادىسى بويىنشا ۇستىمىزدەگى جىلدىڭ 16-تامىز كۇنى مەملەكەتتىك مۇلىك رەەسترىنىڭ gosreestr.kz ۆەب-پورتالىندا، استانا ۋاقىتى بويىنشا ساعات 12:00 باستالادى. «ءۇلبى دەمالىس بازاسى» كاسىپورىنىنىڭ باستاپقى قۇنى 345 509 000 تەڭگە.

«ساۋدا «سامۇرىق-قازىنا» ۇلتتىق ءال-اۋقات قورى» اكسيونەرلىك قوعامىنىڭ جانە داۋىس بەرۋشى اكسيالارىنىڭ (قاتىسۋ ۇلەستەرىنىڭ) ەلۋ پايىزدان استامى تىكەلەي نەمەسە جاناما تۇردە «سامۇرىق-قازىنا» اق-نا تيەسىلى بولعان ۇيىمداردىڭ «سامۇرىق-قازىنا» اق ديرەكتورلار كەڭەسىنىڭ قاۋلىسىمەن بەكىتىلگەن اكتيۆتەردى ساتۋ، قايتا قۇرىلىمداۋدىڭ ءبىرىڭعاي ەرەجەلەرىنە جانە مەملەكەتتىك مۇلىك ۆەب-پورتالىندا مۇلىكتى ساتۋ بويىنشا ەلەكتروندى ساۋدالار وتكىزۋ رەتتەمەسىنە سايكەس جۇرگىزىلەدى»، دەلىنگەن حابارلامادا.

ەنشىلەس جانە تاۋەلدى كاسىپورىنداردى ساتۋ بەيىندى ەمەس اكتيۆتەردەن ارىلۋ ارقىلى «قازاتومونەركاسىپ» ۇاك» اق-نىڭ ەكونوميكالىق قوسىمشا قۇنىن ارتتىرۋ ماقساتىندا جۇزەگە اسىرىلۋدا. سونداي-اق، كومپانيا ءوز قىزمەتىن تەك اتوم ەنەرگەتيكاسى سالاسىنا باعىتتاماق نيەتتە.