ەلدىڭ باس پروكۋراتۋراسى ەكس-پرەزيدەنتتىڭ جەمقورلىق ىسىنە ىلىگۋىنە بايلانىستى سوتقا ساۋال جىبەردى. سەيسەنبى كۇنى برازيليانىڭ فەدەرالدى سوتى قىزمەتىنەن كەتكەن پرەزيدەنت ديلما روۋسسەفف پەن ەلدىڭ ەكس باسشىسى يناسيۋ لۋلا دا سيلۆا "Petrobras" مۇناي كومپانياسىنداعى جەمقورلىقتى تەرگەۋگە كەدەرگى كەلتىردى دەگەن كۇدىكپەن ءىس قوزعادى. "GloboNews" تەلەكانالىنىڭ مالىمەتى بويىنشا، سوتقا سۇراۋدى ەلدىڭ باس پروكۋرورى رودريگۋ جانوت جولداعان. كۇدىكتىلەردىڭ اراسىندا ەكس-مينيسترلەر ەدۋاردۋ كاردوزۋ مەن الويزيۋ مەركادانتي دە بار.
برازيليالىق "Petrobras" كومپانياسى جەمقورلىق داۋىنا 2014 جىلى ىلىككەن. كەلىسىمشارتقا قول قويۋ كەزىندە 3 پايىز كولەمىندە كوميسسيالىق پۇلدى قالتاسىنا باسقان جاسىرىن جۇيە قىزمەتكەرلەرى بۇل اقشانى ساياساتكەرلەردى ساتىپ الۋعا جۇمساعان. برازيليا بيلىگىنىڭ مالىمەتىنە سەنسەك، بۇنداي جۇيە ارقىلى ولار 3،8 ميلليارد دوللار پايدا تاپقان.
روۋسسەففكە سەنىمسىزدىك ءبىلدىرۋ ماسەلەسى برازيليانىڭ وپپوزيسيالىق پارتياسىنىڭ تالابى بويىنشا قاراستىرىلۋدا. وپپوزيسيالىق پارتيا 2015 جىلى كونگرەستە ەل پرەزيدەنتىنىڭ قىزمەتتەن كەتۋىن جانە وعان قاتىستى سالىقتىق زاڭ بۇزۋشىلىق پەن مەملەكەت قارجىسىن پايدالاندى دەگەن كۇدىكپەن ءىس قوزعاۋدى تالاپ ەتكەن. ال دەپۋتاتتاردىڭ قورىتىندى داۋىس بەرۋى 25 تامىزعا جوسپارلانىپ وتىر.
