شقو-دا جاڭا حالىقارالىق ديالوگ الاڭى قۇرىلدى. بۇگىن وسكەمەندە «ۇلكەن التايدىڭ ترانسشەكارالىق كەڭىستىگى: دەموگرافيالىق جانە الەۋمەتتىك-مادەني ۇردىستەر، جاڭا ىنتىماقتاستىق نىسانى» اشىلدى.
حالىقارالىق جاستار مەكتەبى بيىل العاش رەت قاتىسۋشى ەلدەرگە ءوز ەسىگىن اشتى. ول ىنتىماقتاستىق سالاسىن كەڭەيتۋگە، ۇلكەن التاي اۋماعىندا تۇراتىن حالىقتار اراسىندا دوستىقتى نىعايتۋعا باعىتتالعان جوبالارىمەن بەلگىلى «ءبىزدىڭ ورتاق ءۇي - التاي» حالىقارالىق ۇيلەستىرۋشى كەڭەسىنىڭ اياسىندا ارەكەت ەتە باستادى.
شقو ءىسب باسشىسىنىڭ ايتۋىنشا، «ءبىزدىڭ ورتاق ءۇي - التاي» - بىرەگەي ۇيىم، ول جىل سايىن بايلانىستى دامىتۋعا، نىعايتۋعا، شەكارالىق وڭىرلەردىڭ ورنىقتى دامۋىن قامتاماسىز ەتۋگە مۇمكىندىك بەرەدى. جاستار، بالالار ەكولوگيالىق ەكسپەديسياسىنىڭ قاتىسۋىمەن جوبالار تۇراقتى تۇردە جۇرگىزىلەدى. ادامداردىڭ شىعارماشىلىق الەۋەتى وسى كەڭەس جۇمىسىنىڭ اياسىندا جۇرگىزىلگەن ءتۇرلى بايقاۋلار مەن تاقىرىپتىق ساباقتاردا اشىلاتىن بولادى.
حالىقارالىق جاستار مەكتەبىنىڭ جۇمىسى ۇلكەن ازيا ەلدەرى: رەسەي، قازاقستان، جۇڭگو، موڭعوليا جاستارى اراسىنداعى ءعىلىمي-بىلىم بەرۋ، ىسكەرلىك، گۋمانيتارلىق، دوستاستىق بايلانىستاردى ورناتۋعا باعىتتالعان. وعان ستۋدەنتتەر، عالىمدار جانە جاستار ۇيىمىنىڭ وكىلدەرى قاتىسادى.
بۇگىن پلەنارلىق وتىرىستا ولار وڭىرلەردەگى جاستار ساياساتىنىڭ دامۋى جايلى ايتتى، سوسىن مەكتەپ جۇمىسى تايىنتى اۋىلىندا ءوڭىردىڭ ادەمى جەرلەرىنىڭ بىرىندە جالعاستى. تاڭەرتەڭ سەمينار-ترەنينگتەر، دارىستەر ءوتتى، تاجىريبە الماسۋ ءۇشىن الاڭدار اشىلدى.
بەلگىلى بولعانداي، جوبا اياقتالۋ بويىنشا قاتىسۋشىلار مەملەكەتتىك جانە جاستار ساياساتى سالاسىنداعى ىنتىماقتاستىق تۋرالى دەكلاراسياعا قول قويادى.
