وڭتۇستىك قازاقستان وبلىسىنداعى رەسپۋبليكالىق جانە جەرگىلىكتى جۋرناليستەر قازىعۇرت اۋدانىنىڭ «امانكەلدى» جاۋاپكەرشىلىگى شەكتەۋلى سەرىكتەستىگىنە قاراستى ءجۇزىم القابىمەن جانە باۋ شارۋاشىلىعىمەن تانىستى.

150 گەكتار القاپقا وسىرىلگەن ءجۇزىم جايقالىپ، ونىڭ ساباقتارىنا بىتكەن سالالى ءونىم بىردەن كوزگە تۇسەدى. ءجۇزىم تەرىم ناۋقانى دا ەندى باستالعان ەكەن.

ءجۇزىمنىڭ 7-8 سورتى بار. قازىرگى تاڭدا يتاليادان اكەلىنىپ، ەگىلگەن ءجۇزىمنىڭ «كاردينال» سورتىن تەرۋدە. ءجۇزىمنىڭ باسقا دا «كراسنوە»، «بەلوە»، «كرىمسكيي شوكولاد» دەگەن سورتىمەن قوسا جەرگىلىكتى جەرگە بەيىم «تايپا»، «كيش-ميش چەرنىي»، «دامسكيي پالچيك» سورتتارى دا وسىرىلۋدە.

وسىرىلگەن ءجۇزىمدى الدىن-الا تۇزىلگەن كەلىسىم شارت بويىنشا رەسەيدىڭ موسكۆا، حاباروۆسك، يركۋتسك قالالارىنداعى سۋپەرماركەتتەرگە جانە ەلىمىزدىڭ استانا، الماتى، اقتوبە قالاسىنىڭ تۇرعىندارىنا ەكولوگيالىق تابيعي تازا، ءارى بالعىن جەمىستەردى جونەلتۋدە.  

«امانگەلدى» ءجشس-نىڭ ونىمدەرىن ساقتاۋعا ارنالعان جەكە قويماسى بار. سىيىمدىلىعى 2 مىڭ توننا بولاتىن ساقتاۋ ورنىنداعى 10 كامەرا تولىقتاي تولعان ۋاقىتتا ونداعى ونىمدەر وتاندىق نارىقتان بولەك، شەتەلدىك نارىققا شىعارىلادى. بۇگىندە 1 مىڭ گەكتار ەگىستىككە بيداي، ماقسارى، جەمىس-جيدەك پەن ءجۇزىم ءوسىرىپ وتىر.