بۇگىندە تابيعاتى اۋىلشارۋاشىلىق سالاسىنا قولايلى تۇلكىباس اۋدانىندا اسىل تۇقىمدى مال شارۋاشىلىعىن دامىتۋ ەرەكشە قولعا الىنىپ، مال باسى جىلدان-جىلعا ارتىپ كەلەدى. اۋدانداعى ءاربىر شارۋاشىلىق اسىل تۇقىمدى مال باسىن ارتتىرۋدى قولعا العان. ويتكەنى اسىل تۇقىمدى مالدار ەتتى جانە ساتۋعا ىڭعايلى بولادى. بۇگىندە اۋداندا اسىل تۇقىمدى  3008 باس ءىرى قارا مال، 755 باس جىلقى بار. ونىڭ ىشىندە وسىدان 3 بۇرىن اۆستراليا ەلىنەن اكەلىنگەن جاباعىلى اۋىلىنداعى انگۋس جانە گەرەفورد اسىلتۇقىمدى ءىرى قارا مالدار جەرسىنىپ، تولدەپ مال باسى 800-گە جەتكەن. سونىمەن قاتار كەرەيت اۋىلىنداعى رەسەي، تۇركىمەنستان، قىرعىزستان ەلىنەن اكەلىنگەن سايگۇلىكتەر رەسپۋبليكادا وتكىزىلگەن ءتۇرلى جارىستارعا قاتىسىپ، اۋدان مەرەيىن ۇستەم ەتۋدە. ءقازىر وندا 180- گە تارتا اسىل تۇقىمدى سايگۇلىكتەر بار. جالپى اۋداندا  مال شارۋاشىلىعىن دامىتۋ، مالداردى اسىلداندىرۋ مەملەكەتتىك باعدارلامالارى   تولىق ورىندالىپ وتىر. ماسەلەن ءبىر عانا «سىباعا» مەملەكەتتىك باعدارلاماسى  بويىنشا  2016 جىلعا  جوسپار  100 باس انالىق الۋ بولسا، 364  باس انالىق، 12  باس بۇقا ساتىپ الىنىپ، جوسپار 3،6 ەسە   ورىندالدى. سونىمەن قاتار «التىن اسىق»، «قۇلان» باعدارلامالارى اۋداندا بەرىلگەن مەجەدەن ارتىعىمەن ورىندالۋدا.