الماتىداعى المالى اۋداندىق ءىىب مەن ۇقك دەپارتامەنتىنە شابۋىل جاسالعالى دا ءبىر اي ۋاقىت ءوتتى. قاندى وقيعاعا قاتىستى ر. كۇلىكبايەۆ قولعا تۇسكەنىمەن، اتالعان ءىستىڭ كۇماندى ءھام تۇسىنىكسىز تۇستارى از ەمەس. قالا تۇرعىندارى عانا ەمەس، تۇتاستاي رەسپۋبليكا جۇرتشىلىعى پوليسيانىڭ جالعىز قىلمىسكەرگە ءتيىستى تويتارىس بەرە الماۋىن سان-ساققا جۇگىرتىپ، وزىنشە جورۋدا. ىشكى ىستەر ورگاندارى قىزمەتكەرلەرىنىڭ كاسىبي دەڭگەيىنە دە سىن ايتقاندار بولدى.

سوعان قاراماستان قۇزىرلى ورگاندار قوعامدا ۇلكەن رەزونانس تۋعىزعان، تۇتاس ەل كوز تىككەن وسى وقيعاعا قاتىستى تولىق مالىمەت تاراتىپ، ەلگە بولعان جايدى جان-جاقتى تۇسىندىرۋگە، ءتۇرلى الىپ-قاشپا اڭگىمەلەردىڭ الدىن الۋعا قۇلىقسىز سياقتى. وقيعا بولعان كۇنگى باسپا ءسوز حابارلاماسى مەن ودان كەيىنگى شۋلى ءىستى باس پروكۋراتۋرا قىزمەتكەرلەرى قاراۋىنا العانى تۋرالى قۇرعاق اقپاراتتان باسقا بۇل تاقىرىپتا تولىققاندى مالىمەت تارامادى. كەرىسىنشە radiotochka.kz سايتى قالا پروكۋراتۋراسى قالالىق ءىىد –ءنىڭ ىشكى قاۋىپسىزدىك باسقارماسىنا ر. كۇلىكبايەۆ ءىسى بويىنشا تەرگەۋ مالىمەتتەرىنىڭ اشىق دەرەككوزدەردە جاريالانىپ كەتۋى جونىندە قىزمەتتىك تەكسەرىس جۇرگىزۋدى تاپسىرعانىن جازادى.

ەستەرىڭىزدە بولسا، ر. كۇلىكبايەۆتىڭ تەرگەۋ كەزىندە پوليسياعا بەرگەن جاۋاپتارىنىڭ ءبىرقاتارى اقپارات قۇرالدارىندا جاريالاندى. قاندىقول كۇلىكبايەۆتىڭ «پوليسيا عيماراتىندا تەمىر ەسىك بولماعاندا، بۇدان دا كوپ پوليسەيدى جايراتار ەم» دەگەن ءسوزىن Qamshy.kz پورتالى دا جاريالاعان بولاتىن.

radiotochka.kz تىلشىلەرى پروكۋرورلار ناقتى قانداي مالىمەت بويىنشا پوليسيا قىزمەتكەرلەرىن تەكسەرىپ جاتقانىن ءوز كۇشتەرىمەن انىقتاپتى. ول «ۆرەميا» گازەتىندە 27 شىلدە كۇنى جاريالانعان جۋرناليست توقنياز كۇشىكوۆتىڭ «رۋسلان كۇلىكبايەۆ: اڭشىلىق تاجىريبەم بار» دەگەن ماقالاسى ەكەن. وندا اۆتور كۇلىكبايەۆتىڭ تۇزەۋ مەكەمەسىنە قالاي تۇسكەنى، كولونياداعى ءتارتىبى، بۇعان دەيىنگى قىلمىستىق جاۋاپكەرشىلىككە تارتىلۋى، تۇرمەدەن شىققاننان سوڭ ءتيىستى ورگانداردىڭ باقىلاۋىنان سىتىلىپ شىعۋى جانە سوڭعى قىلمىسى ءۇشىن تەرگەۋشىلەرگە بەرگەن ءبىرقاتار جاۋاپتارىن جاريالاعان بولاتىن. ەندى قالالىق پروكۋراتۋرا ماقالادا ايتىلعان دەرەكتەردى جۋرناليستكە جەتكىزگەن پوليسيا قىزمەتكەرىن انىقتاۋدى تالاپ ەتىپ وتىر.

الايدا، پروكۋرورلاردىڭ شامىنا تيگەن ماقالا اۆتورى ءوزىنىڭ مۇنداي تەكسەرۋ باستالعانىنان حابارسىز ەكەنىن ايتقان.

«بۇل تۋرالى ءبىرىنشى رەت ەستىپ وتىرمىن. سوڭعى ۋاقىتتا مەنى ەشكىم ىىد-گە شاقىرمادى. اتالعان جاريالانىم بويىنشا ەشكىم، نە تەلەفون ارقىلى، نە ەلەكتروندى پوشتا ارقىلى حابارلاسپادى. كۇلىكبايەۆ ءىسى بويىنشا مالىمەتتەردى مەن اشىق كوزدەردەن جانە ءوزىمنىڭ دەرەككوزدەرىمنەن الدىم. اقپارات سۇراپ ۇقكد-گە، ىدد-گە بارمادىم. ەگەر، ىشكى قاۋىپسىزدىك باسقارماسىنداعىلار مەنىڭ ماقالاما قىزىعۋشىلىق تۋعىزسا، وندا ول جاريالانا سالا حابارلاسار ەدى عوي»، - دەيدى ت. كۇشىكوۆ.

قاي جاعىنان الساڭىز دا بۇل ىستە ەلگە جان-جاقتى مالىمەت جەتكىزىپ، كوپتىڭ كوكەيىندەگى كۇدىكتى سەيىلتۋدەن گورى، بارىنشا بۇركەمەلەپ، جاسىرىپ-جابۋعا مۇددەلىلىك بايقالاتىن سياقتى. ال، ونداي قۇپيالىلىق كىمگە قاجەت، جەكە ادامنىڭ ءومىرى مەن دەنساۋلىعىنا ەمەس، تۇتاستاي قوعامدىق قاۋىپسىزدىككە قاتەر توندىرگەن وقيعانىڭ ەل نازارىنان تىس زەرتتەلۋىنە كىم مۇددەلى، ول جاعى تاعى بەلگىسىز.

جومارت ابدوللا ۇلى