بۇل تۋرالى سپورتشى تەلەفون ارقىلى ريو-دە-جانەيرودان حابارلادى. ول بارلىعىنا قولداپ، قۇتتىقتاعاندارى ءۇشىن راحمەت ايتىپ، وليمپيادا ويىندارىنا دايىندىق بارىسىندا كومەك كورسەتكەن وبلىس اكىمى دانيال احمەتوۆكە ەرەكشە العىسىن ءبىلدىردى، - دەپ حابارلايدى Qamshy.kz.

برازيليادا وتكەن وليمپيادا ويىندارىندا ءۇش اتتاپ سەكىرۋدەن قولا مەدالدى جەڭىپ العان ولگا رىپاكوۆا، تامىز ايىنىڭ 24ء-ى مەن 27ء-سى ارالىعىندا شۆەيساريالىق لوزاننادا وتەتىن «بريلليانت ليگاسىنا» قاتىسادى.

شقو اكىمى دانيال احمەتوۆ ولگا رىپاكوۆانى قولا مەدالدى جەڭىپ العان كۇنى قۇتتىقتادى. «وليمپيادا ويىندارىندا كەزەكتى مەدالدى جەڭىپ الۋىڭىزبەن شىن جۇرەكتەن قۇتتىقتايمىن! حالىقارالىق سپورت ارەناسىندا بۇل مەدالدىڭ قازاقستان ءۇشىن ماڭىزى زور. ءسىزدىڭ وليمپيادا ويىندارىندا كورسەتكەن جوعارى كورسەتكىشتەرىڭىز ءوسىپ كەلە جاتقان سپورتشىلار ءۇشىن ۇلگى-ونەگە. وزىڭىزگە جارقىن جەڭىستەر، الدا ءالى دە تالاي بيىك شىڭداردى باعىندىرۋىڭىزعا تىلەكتەسپىن!»، - دەدى دانيال احمەتوۆ.

ريو-دە-جانەيرودان سپورتشى بارلىعىنا قولداۋ كورسەتىپ، قۇتتىقتاعاندارى ءۇشىن العىسىن ءبىلدىردى. «بارشالارىڭىزعا مەنى قولداپ، قۇتتىقتاپ جاتقاندارىڭىز ءۇشىن ۇلكەن راحمەت! وليمپيادا ويىندارىنا دايىندىق بارىسىندا كوپ كومەك كورسەتكەن وبلىس اكىمىنە ەرەكشە العىس ايتقىم كەلەدى»، – دەدى ولگا رىپاكوۆا.

ايتا كەتۋ كەرەك، ساپالى جاتتىعۋ بارىسى ءۇشىن كەلىسىمشارت نەگىزىندە رەسپۋبليكانىڭ ۇزدىك دارىگەرلەرى مەن كەڭەسشىلەرى تارتىلدى. سپورتشىنىڭ جەكە جاتتىقتىرۋشىلارى مەن ماماندارىنىڭ رەسپۋبليكاداعى، شەتەلدەردەگى، سونىڭ ىشىندە ريودا وتەتىن وليمپيادا ويىندارىنا قاتىسۋ ماسەلەسى شەشىلدى.

وبلىستىق دەنە شىنىقتىرۋ-سپورت ديسپانسەرى تولىق كولەمدە مەديسينالىق قولداۋمەن قامتىدى. سونىمەن قاتار، اكىمنىڭ اي سايىنعى ستيپەندياسى تولەۋ ماسەلەسى شەشىلدى