ەركىن كۇرەستەن لوندون وليمپياداسىنىڭ قولا جۇلدەگەرى، قازاقستان رەسپۋبليكاسىنىڭ ءتورت دۇركىن چەمپيونى اقجۇرەك تاڭاتاروۆ ريو وليمپياداسىندا كۇرەستەن ب ا ق سىناعان سپورتشىلارىمىز بەن قازاقستان قۇراماسىنىڭ باپكەرلەرىنە قاتىستى ويىن ءبىلدىردى، - دەپ حابارلايدى Qamshy.kz.
اقجۇرەك تاڭاتاروۆ ينستاگرام پاراقشاسىندا ريوداعى كەلەڭسىز جاعدايلاردان كەيىن كۇرەس فەدەراسياسى بارلىعىن جونگە كەلتىرەدى دەگەن سەنىمدەمىن دەپ جازعان.
«بۇگىن وليمپيادا ويىندارىنىڭ سوڭعى كۇنى. ءبىراق ەركىن كۇرەستەن ءبىزدىڭ پالۋاندارىمىز مەدالسىز قالدى. سوڭعى ءۇمىت مامەد يبراگيمدە. ايتايىن دەگەنىم، بار جۇكتى پالۋاندارعا ارتپاي، باسشىلىقتان دا سۇراۋ الۋ كەرەك شىعار. ءسوزدىڭ اشىعى، كۇرەس فەدەراسياسىنا تەمىرجولشىلاردى ەمەس، ناعىز كۇرەس مايتالماندارىن شاقىرتۋ كەرەك. ەلىمىز ناعىز ەركىن كۇرەس ماماندارىنان كەندە ەمەس. بايرامۋكوۆ يسلام اعامىزدىڭ ءوزى ءبىر توبە. باستىسى ۇلت، ەل جاناشىرى. ال قازىرگى باس باپكەرگە كەلەتىن بولساق، مىقتى بولسا نەگە ءوزىنىڭ كاسىپقوي باپكەرلىگىن جاپونيادى، اقش-تا، لاتۆيادى، رەسەي فەدەراسياسىندا قالىڭ ەلگە دالەلدەمەگەن؟ سول كىسىنىڭ ارقاسىندا جەرگە قاراپ، ريو وليمپياداسىندا جۇلدەسىز قالعان ءبىزدىڭ پالۋاندار بولعانى ما؟ ناتيجەسىز باپكەرگە قوماقتى قارجى تولەپ جۇلدەسىز قالعانشا، ازىن-اۋلاق اقشانى قاناعات تۇتىپ، وتانىمىزدىڭ داڭقى ءۇشىن ەرەن ەڭبەك ەتكەن ءوزىمىزدىڭ باپكەرلەرگە نەگە تابىستاماعان ەكەن وليمپيادا ويىندارىن؟ ريوداعى كەلەڭسىز جاعدايلاردان كەيىن كۇرەس فەدەراسياسى بارلىعىن جونگە كەلتىرەدى دەگەن سەنىمدەمىن» - دەگەن ويىن بولىسكەن سپورتشى.
سونداي-اق تاڭاتاروۆ ريو وليمپياداسىندا قازاق پالۋاندارى ءۇشىن وليمپيادانىڭ ناتيجەسىز اياقتالارىن سەزگەنىن ايتادى.
«قازاق پالۋاندارى ءۇشىن وليمپيادا ويىندارىنىڭ ءدال وسىلاي ناتيجەسىز، جۇلدەسىز وتەتىنىن ءىشىم سەزگەن ەدى. مەدال تۇگىلى، قىزىقتى جان تۇرشىگەرلىك كۇرەس كورمەدىك بۇل جولى. ەركىن كۇرەستىڭ شىرقىن بۇزعانداي. قازاقستان قۇراماسىنىڭ باپكەرلەرىنە قاراساڭ قارنىڭ اشادى. فەدەراسيا مۇشەلەرى مەن باس باپكەر ەندى قالاي اقتالار ەكەن؟ بالكىم پالۋاندارىمىزدىڭ بولاشاعىنا بالتا شاپپاي، ءوز لاۋازىمدارىن بىلىكتى ماماندارعا بەرەر. «وزگە ەلدە سۇلتان بولعانشا، ءوز ەلىڭدە ۇلتان بول» دەمەكشى باس باپكەر ءوز وتانىنا ورالعانى ءجون شىعار. ارينە ەگەر ول جاق قۇشاق جايا قابىلداسا. جالپى، ەلىمىزدىڭ پالۋاندارىنا ەش قارسىلىعىم جوق. سول پالۋاندارعا جول سىلتەپ، جەڭىسكە جەتەلەي المايتىن باپكەرلەردەن نە پايدا؟» - دەيدى.
سونىمەن بىرگە قازاقستاننىڭ ءتورت دۇركىن چەمپيونى سپورتشىلارعا ەمەس، باس باپكەرگە كوڭىلى تولمايتىنىن دا جەتكىزدى.
"بىلە بىلگەن ادامعا، مەن بۇل پوستتى پالۋان دوستارىمدى عايباتتاۋ ءۇشىن ەمەس، ءومىرىن كۇرەسكە ارناعان، تاعدىرىن كۇرەسپەن بايلاعان دوستارىمنىڭ ەرەن ەڭبەگىن ەش قىلعان باس باپكەر مەن فەدەراسيا مۇشەلەرى جايىندا ءسوز قوزعاعام. باس باپكەرىمىز بىلدەي ەكى دۇركىن وليمپيادا چەمپيونى، داڭقتى سپورتشى بولا تۇرا پالۋاندارىمىزعا دۇرىس تاكتيكا قويا بىلمەدى. شىندىقتى ايتقاننىڭ ايىبى جوق. ايتپايىن دەسەم پالۋاندارىمىز ءۇشىن ءىشىم كۇيىپ بارادى" - جازعان اقجۇرەك تاڭاتاروۆ.
ايتا كەتەيىك، كۇرەستەن قازاقستان قۇراماسىنىڭ قازىرگى باس باپكەرى سەرگەي بەلوگلازوۆ ەكى مارتە وليمپيادا چەمپيونى، التى دۇركىن الەم چەمپيونى اتانعان، كسرو-نىڭ ەڭبەك سىڭىرگەن سپورت شەبەرى. ونىڭ دايىنداعان پالۋاندارى ريوداعى بوز كىلەمدە بەدەلدەسكەندەرىنىڭ بارلىعىنان جىعىلىپ قالدى.
