ناۋرىز ايىنىڭ ورتا شەنى ەدى. رەداكسياعا كىرسەم مارحاباتتىڭ كۇرەڭ شايىن سوراپتاپ، ويعا شومىپ ءامىرحان وتىر ەكەن. كەزدەسپەگەلى كوپ بولىپ ەدى، شۇيىركەلەسە كەتتىك. انتيكالىق ادەبيەت، شىڭعىسحان تاقىرىپتارى اقىرىنداپ قازاق قوعامىنىڭ قازىرگى جاي-كۇيىنە ويىستى. ول اڭگىمەنى مەنىڭ كابينەتىمدە شىلىم شەگىپ وتىرىپ ساباقتادىق... - جازۋشىلار كەرەك بولماعان مەملەكەتكە جۋرناليستەر كەرەك دەپ ويلايسىڭ با، سەكە؟ -دەدى ءبىر مەزەتتە. كۇلدىم. سەبەبى جاۋاپ ءوز سۇراعىنىڭ استارىندا جاتىر ەدى. شىلىمىن قۇشىرلانا سورىپ: -مىسالى ءبىزدىڭ ەنسيكلوپەدياداعىلاردىڭ جۇمىسسىز وتىرعانىنا 3-4 ايدىڭ ءجۇزى بولدى. قازاقتىڭ ەنسيكلوپەدياسى قازاق ۇكىمەتىنە كەرەك بولماي تۇر. قارجى جوق؟! ساۋىردە جۇمىس باستالادى ەكەن دەپ ەستىدىم، باستالماسا امالىن قاراستىرۋ كەرەك، مارحادان ۇيات بولدى... -بۇل مەملەكەتكە ەنسيكلوپەديا تۇگىلى قازاقتىڭ ءوزى دە كەرەك ەمەس سەكىلدى عوي... -راس ايتاسىڭ. مەنىڭ دە سەنىمىم از. جازۋ كەرەك ەدى. وي كوپ، جازايىن دەسەم "كىمگە كەرەك، كىمگە كەرەكپىز؟" دەگەن سۇراق كولدەنەڭ جاتىپ الادى. مىسالى، 40-تان اسقانشا ادەبيەتتى زەرتتەدىم، جازدىم. نە جەتىستىككە جەتتىم؟ جەكەشەلەنبەگەن ءۇيىم، ماعان ۇمىتتەنە قاراعان ايەل مەن قىزىم بار... ارقادان قاققانعا ءماز بولىپ جۇرە بەرىپپىز. ماراپات دەگەن دە ماندىماعان. ىشىندەگى ماقتان تۇتارلىعى ءوزىڭ تاققان ءاليحاننىڭ توسبەلگىسى... "اباي" پورتالىنىڭ جىگىتتەرى ءبىر تاماشا باستاما كوتەرگەن ەدى. ءاليحان بوكەيحانوۆ اتىنداعى توسبەلگى جاساتىپ، بىرنەشە ادامدى ماراپاتتاعان بولاتىن. داۋرەن قۋاتتىڭ ۇسىنىسى بويىنشا سول تاڭداۋلىلار اراسىنداعى ءامىرحانعا توسبەلگىنى مەن تاعىپ ەدىم... 2 ساعاتتاي سويلەستىك. ابەكەڭ تولقىپ وتىرىپ تالاي ويدىڭ باسىن شالدى. سودان كەيىن:-جارايدى، ءبىراز ۋقىتىڭدى الدىم ءبىر جەرگە بارىپ كەلەيىن. سودان كەيىن مارحاباتتى جەتەلەپ ۇيگە قايتىرمىن-دەپ كۇلدى. ساعات 4 شاماسىندا قايتا سوقتى. تاعى اڭگىمە، كۇلسالعىش تۇقىلعا تولدى. بۇل سوڭعى كەزدەسۋىمىز ەكەن. 1 ايعا تولار تولماس ۋاقىتتان كەيىن ءامىرحان كەلمەستىڭ كەمەسىنە ءمىنىپتى. ساپاردا ءجۇرىپ ەستىدىم. جازعانىنان جازارى كوپ، ءبىلىمى ۇشان-تەڭىز تاعى ءبىر ازامات ورالماسقا اتتاندى. يماندى بولسىن! "جازىمىشتان وزىمىش بار ما" دەيمىز قازاقىلىققا سالىپ. تەك ءامىرحاننىڭ كەۋدەسىندە "كىمگە كەرەك، كىمگە كەرەكپىز؟" دەگەن شەرلى سۇراق كەتكەنى وكىنىشتى... باقۇل بول، باۋىرىم!

سەرىك ابىكەننىڭ فب-پاراقشاسىنان