بۇگىن ءال-فارابي اتىنداعى قازاق ۇلتتىق ۋنيۆەرسيتەتىندە ستۋدەنتتەر مەن تۇلەكتەردىڭ «ماڭگىلىك ەل» سالتاناتتى قاقپاسى» مەن دميتريي بالاندين اتىنداعى جاڭا ءجۇزۋ باسسەينىنىڭ اشىلۋ ءراسىمى وتەدى، - دەپ حابارلايدى Qamshy.kz.

سالتاناتتى جيىنعا الماتى قالاسىنىڭ اكىمى ب.بايبەك، قازۇۋ رەكتورى ع.مۇتانوۆ، جوو تۇلەكتەر اسسوسياسياسىنىڭ پرەزيديۋم مۇشەلەرى، ستۋدەنتتەر مەن وقىتۋشىلار، قوعامدىق ۇيىمدار مەن ب ا ق وكىلدەرى قاتىسادى. سونىمەن قاتار ءىس-شاراعا قازۇۋ ستۋدەنتتەرى، وليمپيادا چەمپيوندارى مەن جۇلدەگەرلەرى د.بالاندين، ە.سمەتوۆ پەن ە.سىزدىقوۆا قاتىسپاق.

سالتاناتتى قاقپا قازاقستان رەسپۋبليكاسىنىڭ تۇڭعىش پرەزيدەنتى، ۇلت كوشباسشىسى نۇرسۇلتان ءابىش ۇلى نازاربايەۆتىڭ «ماڭگىلىك ەل» يدەياسىن بەينەلەپ تۇراتىن قازۇۋ قالاشىعى جاڭا ارحيتەكتۋرالىق كەشەنىنىڭ نەگىزى بولىگى.

قازۇۋ قالاشىعى اۋماعىنداعى ارحيتەكتۋرالىق جوبانى قۇرۋ يدەياسى قازۇۋ-دىڭ ۇزدىك تۇلەكتەرىنە تيەسىلى. ال جوبانىڭ قۇرىلىسى سول ازاماتتاردىڭ ەرىكتى سالىمدارى نەگىزىندە جۇزەگە استى.

ستۋدەنتتەر مەن تۇلەكتەر قاقپاسىنىڭ اشىلۋى – 19:45، قازۇۋ قالاشىعىنىڭ ورتالىق الاڭى (تيميريازيەۆ كوش. «قازۇۋ قالاشىعى» ايالداماسى).

وسى كەشتە جۇزۋدەن العاشقى وليمپيادا چەمپيونى دميتريي بالاندين اتىنداعى جاڭا 25 مەترلىك ءجۇزۋ باسسەينىنىڭ سالتاناتتى اشىلۋ ءراسىمى وتەدى. بالاندين اتىنداعى ءجۇزۋ باسسەينىنىڭ اشىلۋ ءراسىمى – 20:30، سپورت كەشەنىنىڭ اۋماعى.

الداعى ۋاقىتتا ءجۇزۋ باسسەينى ستۋدەنتتەردىڭ يگىلىگىنە قىزمەت ەتپەك. سونىمەن قاتار سپورت كەشەنىندە سينحروندى جۇزۋدەن قازۇۋ قۇراماسىنىڭ جاتتىعۋلارى مەن سپورتشىلاردى ايماقتىق، ۇلتتىق جانە حالىقارالىق جارىستارعا دايىنداۋ  جۇمىستارى جۇرگىزىلىپ، ۋنيۆەرسيتەتتەر اراسىنداعى سپورتتىق جارىستار ۇيىمداستىرىلاتىن بولادى. سالتاناتتى ءىس-شارادا الماتى قالاسى بالالار مەن جاسوسپىرىمدەردىڭ جۇزۋدەن سپورت مەكتەبىنىڭ تاربيەلەنۋشىلەرى اراسىندا وليمپيادا چەمپيونى جۇلدەسىنە جارىس وتەدى.