قىزىلورداداعى "بوتا" قوعامدىق قورىنىڭ قىزمەتكەرلەرىنە ارال تۇرعىندارىنا بولىنگەن 26 ميلليون تەڭگەنى ۇرلادى دەگەن ايىپ تاعىلۋدا، دەپ حابارلايدى تەنگرينيۋس.

تەرگەۋ بارىسىندا "بوتا" قوعامدىق قورىندا جۇمىس ىستەگەن بۇرىنعى قىزمەتكەرلەر 2012-2013 جىلدارى اقشادان تارىققان جەرگىلىكتى تۇرعىنداردىڭ قۇجاتتارىن تولتىرىپ، بانكتىك كارتوچكالار ارقىلى اقشا الىپ وتىرعان. الاياقتار سول جىلدارى شامامەن 26،76 ميلليون تەڭگەنى جىمقىرعانى انىقتالعان.

"بۇل جەردە تۇرعىنداردىڭ اڭقاۋلىعىن ايتا كەتۋىمىز كەرەك. تۇرعىنداردىڭ كەيبىرى ءتىپتى ءوز قۇجاتتارىن "بوتا" قورىنىڭ قىزمەتكەرلەرىنە نە ءۇشىن قاجەت ەكەنىن سۇراماستان بەرە سالعان. ولار ءتىپتى ءوز اتتارىنان الدەبىرەۋلەردىڭ اقشا الىپ وتىرعانىن دا بىلمەگەن"، - دەپ جازىلعان ماقالادا.

ەستەرىڭىزگە سالا كەتەيىك، «بوتا» قورى 2008 جىلى قۇرىلعان. ونىڭ نەگىزگى ميسسياسى - قازاقستانداعى الەۋمەتتىك جاعدايى تومەن وتباسىلاردان شىققان بالالار مەن جاستاردىڭ ءال-اۋقاتىن ولاردىڭ دەنساۋلىعى، ءبىلىمى مەن الەۋمەتتىك قورعالۋىنا ينۆەستيسيا جاساۋ ارقىلى جاقسارتۋ. قازىرگى ۋاقىتتا قور 3 باعدارلاما اياسىندا جۇمىس جاسايدى. 

ال، تالاي ءبۇلدىرشىن كومەك كۇتىپ وتىرعان  قوردىڭ مۇنداي قۇيتىرقى ارەكەتكە بارۋى  ۇيات ەكەن.