قازاق سپورت جانە تۋريزم اكادەمياسىندا ءبىلىم كۇنى مەرەكەسىنىڭ سوڭى تالاپكەرلەردىڭ نارازىلىق شاراسىنا ۇلاسىپ كەتتى. ەسىك الدىن قاۋمالاعان تۇلەكتەر گرانتقا تۇسە الماعاندارىنا رەنجۋلى. ال وسى اكادەمياعا قۇجات تاپسىرعان 250-دەي رەسپۋبليكالىق، حالىقارالىق جارىستاردىڭ جۇلدەگەرلەرى ءۇشىن نەبارى 20 گرانت ءبولىنىپتى، - دەپ حابارلايدى Qamshy.kz كتك ارناسىنا سىلتەمە جاساپ.

ءبىلىم كۇنى وزگە وقۋ ورىندارى سەكىلدى قازاق سپورت جانە تۋريزم اكادەمياسىندا دا وسىلاي اتالىپ ءوتىپ جاتقان. ريو وليمپياداسىنىڭ چەمپيونى مەن جۇلدەگەرلەرى قوناق بوپ، كادىمگى مەرەكەگە جالعاسقان ەدى. الايدا سالتاناتتى شارانى اياقتاتپاي، تالاپكەرلەردىڭ قالىڭ توبى ەسىك الدىن قاۋمالاپ الدى. وڭكەي رەسپۋبليكالىق، حالىقارالىق دودالاردىڭ جۇلدەگەرلەرى گرانتقا ىلىگە الماي قالعان. جاعدايدى ۋشىقتىرعىسى كەلمەگەن اكادەميا باسشىلىعى الدارىنان شىعىپ، سابىرعا شاقىردى. 

-مەملەكەتتىك گرانت سانى جىلداعىعا قاراعاندا وتە از بولىنگەن بولاتىن. سىزدەردىڭ نارازىلىقتارىڭىزدى وتە ورىندى دەپ ويلايمىز.

ارنايى سپورت مەكتەپتەرى مەن كوللەدجدەرىنىڭ تۇلەكتەرىنەن اكادەمياعا 250-گە تارتا قۇجات تاپسىرىلىپتى. ءبىراق جوعارى وقۋ ورنىندا ولارعا نەبارى 20-اق گرانت بولىنگەن ەكەن. 

ايدوس دۋاش، تالاپكەر:

-بوكسپەن اينالىسقانىما 5 جىل بولدى. وسى بەس جىلدىڭ ىشىندە قازاقستاننان ەكى رەت 3ء-شى الدىم، ءبىر رەت ءبىرىنشى ورىن الدىم. سوسىن ازيا بىرىنشىلىگىنەن ءبىرىنشى ورىن الدىم.گرانت از ءبولىنىپ جاتىر. سول سەبەپتەن تۇسە الماي قالىپ وتىرم وسى جەرگە. 1-2 بالل عانا جەتىسپەي.

تالاپكەرلەردىڭ اراسىندا الداعى قىسقى ۋنيۆەرسياداعا قاتىسايىن دەپ وتىرعاندارى دا بار.

يگور ينسكيي، تالاپكەر:

- شاڭعى سپورتىنان ۋنيۆەرسياداعا قاتىساتىنداردىڭ ءبىرىمىن. ءبىراق گرانت جەتكىلىكتى بولىنبەگەندىكتەن ەندى بۇكىلالەمدىك جارىستان قالىپ قويۋىم مۇمكىن. ويتكەنى اقىلى وقۋعا شامام جەتپەيدى.

اكادەميادا كوللەدجدەن كەلگەندەرگە بىلتىر 60 ورىن ءبولىنىپتى. ول دا اسا كوپ ەمەس. ال بيىل سونىڭ ءوزى 3 ەسەگە دەيىن قىسقارىپ كەتكەن. باسشىلىق بولسا، وزدەرىنشە اقتالىپ الەك.

مۇحتار ەسقالييەۆ، قازاق سپورت جانە تۋريزم اكادەمياسىنىڭ پرورەكتورى:

- قر-نىڭ ءبىلىم جانە عىلىم ءمينيسترىنىڭ اتىنا ءوزىمىز حات جولداعان بولاتىنبىز، وسى ماسەلە بويىنشا. قوسىمشا وسى قىسقارتقان وقۋ تۇرىنە دەنە شىنىقتىرۋ ماماندىعى بويىنشا قوسىمشا ورىندار بولىنسە دەگەن. بۇگىنگى كۇندە ەشقانداي ناتيجەسىن بەرىپ وتىرعان جوق.

ايتا كەتەرلىگى، ءبىلىم مينيسترلىگىنىڭ ءوزى 2012 جىلى وسى دەنە شىنىقتىرۋ جانە سپورت ماماندىقتارىنىڭ گرانت سانىن مىڭعا دەيىن جەتكىزۋ تۋرالى باستاما كوتەرىپتى. ءبىراق ول ءسوز جۇزىندە قالعان. ال گرانتتان قاعىلعان مىنا تالاپكەرلەر ءۇشىن ەندى 400 مىڭ تەڭگە تولەپ، اقىلى وقۋعا تۋرا كەلەدى.