قازاقستاندىق بوكسشى دانيار ەلەۋسىنوۆ كاسىپقوي بوكسقا اۋىساتىن بولدى. ول جاقىندا اقش-تا جۇرگەن اعاسى داۋرەننىڭ جانىنا بارادى. بۇل تۋرالى امەريكالىق باسىلىمداردىڭ ءبىرى جازدى، - دەپ حابارلايدى Qamshy.kz BNews.kz - كە سىلتەمە جاساپ.

«25 جاستاعى جارتىلاي ورتا سالماقتاعى قازاقستاندىق بوكسشى برۋكليندە (نيۋ-يورك) پروموۋتەرا لۋ دي بەللانىڭ قول استىندا جاتتىعۋ جاساپ جۇرگەن اعاسى داۋرەننىڭ جانىنا باراتىنى ءمالىم بولدى»، - دەپ جازىپتى Boxing News.

مۇنىڭ الدىندا بوكسشى اقپارات قۇرالدارىنا بەرگەن سۇحباتىندا: «الداعى ۋاقىتتا نە بولارىن ءبىر اللا عانا بىلەدى. الدىن الا ەشتەڭە ايتپاي-اق قويايىن. ازىرگە ەشبىر پروموۋتەردەن ناقتى ۇسىنىس تۇسكەن جوق» - دەگەن ەدى.

تەك بەلگىلى بولعانى – رەسەيلىك ۆلاديمير حريۋنوۆ ەلەۋسىنوۆپەن جۇمىس ىستەۋگە دايىن. Bleacher Report پورتالىنىڭ حابارلاۋىنشا، ەلەۋسىنوۆ كاسىپقوي بوكسقا اۋىسىپ جاتسا، ۇزاق جىلدار بويى جارتىلاي ورتا سالماقتىڭ ۇزدىگى بولارى ءسوزسىز.

ايتا كەتەيىك، دانياردىڭ اعاسى 31 جاستاعى داۋرەن ەلەۋسىنوۆ اۋەسقوي بوكستا قازاقستان چەمپيونى بولعان. 2014 جىلى كاسىپقوي بوكسقا اۋىسىپ، بۇگىنگە دەيىن باس-اياعى 6 كەزدەسۋ وتكىزدى. بەس قارسىلاسىن نوكاۋتپەن ۇتتى، ءبىر جەكپە-جەگىندە تەڭ ءتۇستى