وڭتۇستىك قازاقستاندا جاڭا وقۋ جىلى وقىس وقيعامەن باستالدى. سايرام اۋدانىنىڭ ورتالىعى - اقسۋكەنتتە وقۋشىلار اتىسقان. كەيبىر اقپارات كوزدەرى قارۋدان وق اتىلدى دەسە، باسقا كۋاگەرلەر وقۋشىلاردىڭ بىر-بىرىمەن تاسپەن اتىسقانىن ايتادى. باسى جارىلعان ءبىر بالا اۋرۋحاناعا جەتكىزىلدى، - دەپ حابارلايدى Qamshy.kz 31 ارناعا سىلتەمە جاساپ.

سايرام اۋدانىنىڭ ورتالىعى اقسۋكەنت ەلدىمەكەنىندە ەكى توپقا بولىنگەن مەكتەپ وقۋشىلارى بىر-بىرىمەن قاقتىعىسقان. كورگەن كۋاگەرلەر وقۋشىلاردىڭ بىر-بىرىنە تاس لاقتىرىپ، اتىسقانىن راستاعان. ءتىپتى، ساكەن سەيفۋللين مەكتەبىنىڭ 11 «ۆ» سىنىپ وقۋشىسى نۇرلان بەكبايەۆ تاس تيگەن سوققىدان باسى جارىلىپ، جەدەل جاردەممەن اۋرۋحاناعا جەتكىزىلگەن.

ابدۋجاليل وسمانوۆ، سايرام اۋدانى ەمحاناسىنىڭ حيرۋرگ-تراۆموتولوگ دارىگەرى:

- باس ميىنىڭ شايقالۋى بار. باسىنىڭ شاشتى تۇسىندا جارىلعان، سىرىلعان جاراقاتتار. العاشقى كومەك كورسەتىلدى. ەم تاعايىندالدى. جاراعا العاشقى حيرۋرگيالىق كومەك بەرىلدى.

مەكتەپ توڭىرەگىندە نۇرلان بەكبايەۆقا تاس ەمەس، وق ءتيدى دەگەن قاۋەسەت تە ايتىلىپ قالۋدا. الايدا، ونىڭ اناسى جۇماعازى بەكبايەۆا ۇلىمنىڭ جاراسىن تاڭۋعا اپارا جاتىرمىن دەپ، سۇحبات بەرمەدى. ال كورگەن كۋاگەرلەر بولسا، وقۋشىلار تاس اتىستى دەيدى.

- اتىس بولعان جوق. تەك ايعايلاسىپ، قىرىلىپ توبەلەسكەنى بولماسا...

- توبەلەس بولدى.

مەكتەپ مەن ءبىلىم بولىمىندەگىلەر وق اتىلدى دەگەندى قاۋەسەتكە بالاپ وتىر. ءتىپتى وقۋشىلار توبەلەستى دەگەندى دە جۇمسارتىپ، ويناپ ءجۇرىپ باسى جارىلىپتى دەيدى.

جومارت بەكتاسوۆ، سايرام اۋداندىق ءبىلىم ءبولىمىنىڭ ادىسكەرى:

 - بىرەۋى جىعىلىپ باسى جارىلعان. ودان كەيىن مەكتەپ اكىمشىلىگى جەدەل جاردەم قىزمەتىن شاقىرعان. ىشكى ىستەر قىزمەتكەرلەرى ول ەكى وقۋشىنى اتا-اناسىمەن ىشكى ىستەر بولىمىنە شاقىرىپ، تۇسىنىكتەمەلەر العان.

نۇرلان بەكبايەۆپەن بىرگە ويناپ جاتقانىمدا، اياعى ءسۇرىنىپ، باسى جارىلدى دەيدى دۋلات باتىربەكوۆ. ءسوزىن سەنىمسىز جەتكىزدى. ونىڭ ۇستىنە ەكەۋى ەكى سىنىپتىڭ وقۋشىلارى ەكەن. وقيعانىڭ ناقتى قالاي بولعانىن قۇزىرلى ورىنداعىلاردىڭ ەنشىسىنە قالدىردىق. الايدا ولار دا بۇگىن ءۇنسىز. سايرام اۋداندىق پوليسيا باسقارماسىنداعىلار باسشىلىقتان ەشقايسىسى جوق دەپ شىعارىپ سالدى. وبلىستىق ىشكى ىستەر دەپارتامەنتىنە بەرگەن حاتىمىز دا جاۋاپسىز.