وڭتۇستىك قازاقستان وبلىسىندا ماقسارى داقىلىن ورۋ قىزۋ ءجۇرىپ جاتىر. ديقاندار الا جازدايعى ەڭبەگىنىڭ ارقاسىندا وسىرگەن ءداندى داقىلدى توكپەي-شاشپاي دەر كەزىندە جيناپ الۋعا تىرىسۋدا. بيىل اۋا رايىنىڭ قولايلى بولۋى مەن اگروتەحنيكالىق تالاپتاردىڭ ساقتالۋىنان ءونىم بىتىك شىققان. ءتۇسىم دە جوعارى. ماقسارى ءدانىن بىلتىر شەتەلگە شيكىزات كۇيىندە جونەلتكەن شارۋالار سۇرانىس بولسا، ونى وڭدەپ، وسىمدىك مايىن ەكسپورتتاماق نيەتتە، - دەپ حابارلايدى Qamshy.kz 24.kz - كە سىلتەمە جاساپ.

اۋىل شارۋاشىلىعى وندىرىستىك كووپەراتيۆىنىڭ ەگىستىك القابىنداعى ساقىلداعان تەحنيكالار كۇندىز-تۇنى توقتاۋسىز ەڭبەك ەتۋدە. سوڭعى ۇلگىدەگى كومبايندار تاۋلىگىنە 40 گەكتارعا دەيىن ەگىن ورادى. 20 جىلعا جۋىق تەمىر تۇلپاردىڭ تىزگىنىمەن الىسىپ كەلە جاتقان زايىر مۇستافايەۆ كولىكتىڭ ىشىندە جۇرگىزۋشگە قاجەتتى جاعدايدىڭ بارلىعى جاسالعان دەيدى.

زافار مۇستافايەۆ، مەحانيزاتور:

- ءونىمنىڭ جاقسى بولۋىن باسىنداعى بۇرشىگىنە قاراپ، بىلۋگە بولادى. بيىل ءونىم جاقسى. «نيۆا»، «ەنيسەي» كومباينى ءبىر اينالعاندا بۇل ەكى رەت ءجۇرىپ وتەدى. ودان كەيىن دەستەلەگىشى – 6 مەتر. جيناعان كەزدە بۇندا شىعىن وتە از بولادى. بۇل تازا جينايدى.

قاتارىنان ەكى جىل قۇرعاقشىلىققا ۇرىنىپ، سالدارى سۋعا كەتكەن ديقانداردىڭ بيىل كوڭىلدەرى توق. ويتكەنى بيىل ەگىن بىتىك شىقتى. وعان اگروتەحنيكالىق تالاپتاردىڭ قاتاڭ ساقتالۋى تومەن تۇقىمنىڭ جەرگىلىكتى ءتۇرىن سەبۋ سەپ بولعان.

ماقسارى وزگە ءداندى داقىلدارعا قاراعاندا كوپ كۇتىمدى قاجەت ەتپەيدى. بۇعان ەرتە كوكتەمدە مول جاۋىن شاشىن مەن اپتاپتى ىستىق بولسا، جەتىپ جاتىر. دەگەنمەن شارۋالار بىلتىرعىعا قاراعاندا بيىل مول ءونىم الىپ وتىرمىز دەيدى. ءقازىردىڭ وزىندە ءار گەكتاردان ورتا ەسەپپەن 15 سەنتنەردەن ءدان الىپ جاتىر ەكەن.

كوپپەراتيۆ بيىل ەرتە كوكتەمدە قۇرىلىپتى. جالپى 60-قا تارتا ۇلەسكەرى بار. ۇجىمداعىلاردىڭ باستى ماقساتى – ماقسارى كلاستەرىن قۇرۋ. وسى باعىتتا ارنايى جوبالارىن دا ازىرلەپ قويىپتى. ءداندى داقىلدى ەگۋدەن باستاپ، ونى تەرەڭ وڭدەۋ جاعى دا قاراستىرىلعان. قاجەتتى ديىرمەندەرى مەن ماي سىعاتىن قۇرىلعىلارى دا بار. قالدىعىنان سابىن جاسالادى ەكەن. توپانى مالعا ازىق. ءبىر سوزبەن ايتقاندا، ءونىم قالدىقسىز وڭدەلەدى. «تەك ۇكىمەتتەن قولداۋ بولسا، ماقسارى ءونىمى دە وڭتۇستىكتىڭ برەندى بولار ەدى»، - دەپ وتىر ديقاندار.

حالي سارمانوۆ، «سايرام – اگرو» اشوك ءتوراعاسى:

- ەندى بۇدان ارى قاراي ءونىمدى 20 سەنتنەرگە دەيىن كوتەرسەك دەگەن ويىمىز بار. ول ءۇشىن بىزگە تىڭايتقىش بەرۋ كەرەك. قازىرگى تاڭدا ەشقانداي شارۋا ماقسارىعا تىڭايتقىش بەرمەيدى. سونى قولعا الۋ كەرەك. ودان كەيىن قايتا وڭدەۋدى قولعا الۋ كەرەك. ۇكىمەت تاراپىنان كومەك بولسا، ماقسارى ءدانىن بۇكىل دۇنيە جۇزىنە بەلگىلى برەندپەن – «وڭتۇستىك قازاقستاندا شىعارىلعان» دەگەن اتاۋمەن شىعارساق دەگەن ماقسات بار.

شارۋالار بىلتىر ءونىمدى داندەي شەتەلگە جونەلتكەن.سۇرانىس بولسا، ونى وڭدەپ وسىمدىك مايىن دا ەكسپورتتاۋدى كوزدەپ وتىر. سەبەبى تابىسى مول. ادام اعزاسىنا وتە پايدالى جانە دارۋمەندىك قاسيەتى بار ماقسارى مايىنا جۇڭگو مەن تۇركيا سياقتى جالپى الەمنىڭ الپاۋىت ەلدەرىنەن سۇرانىس كوپ ەكەن. سوعان قاراي وبلىستا ماقسارى ەگىسىنىڭ كولەمى دە ارتىپ كەلەدى، دەيدى ماماندار.

ايدوس ابيحانوۆ، وبلىستىق اۋىل شارۋاشىلىعى باسقارماسى باسشىسىنىڭ ورىنباسارى:

- اۋىلشارۋاشىلىق ەگىس كولەمى 12 مىڭ 800 گەكتارعا ارتىپ، 788 600 گەكتاردى قۇراپ وتىر. ونىڭ ىشىندە، اتاپ ايتقاندا، ماقسارى كولەمى 74 مىڭ گەكتار جەرگە ەگىلگەن. ونىڭ بۇگىنگى تاڭدا 28 مىڭ گەكتارى ورىلىپ، ودان 20 مىڭ توننا ءونىم الىندى. جالپى ورتاشا ەسەپپەن العاندا كورسەتكىش 1 گەكتاردان 8،5 سەنتنەردەن تۇسەدى دەپ كۇتىلۋدە.

شارۋالار ەندىگى كەزەكتە ماقسارى زيانكەستەرىنە قارسى كۇرەستى كۇشەيتپەك. سەبەبى بۇعان دەيىن قالتا كوتەرمەيتىن. باعانىڭ ءوسۋى جاعدايدى جاقسارتىپ قانا قويماي، جەرگە دە كۇتىم جاساۋعا مۇمكىندىك بەردى، دەيدى ديقان. 26 جىلدان استام وسى سالادا ەڭبەك ەتىپ كەلە جاتقان شارۋا وبلىستا شىعىنى از، پايداسى كوپ ماقسارى القابىن ۇلعايتۋدى ۇسىنىپ وتىر. ويتكەنى وڭتۇستىكتىڭ اپتاپ ىستىعى وسىمدىكتىڭ بۇل تۇرىنە وتە قولايلى، دەيدى ول.