رەسەي پرەزيدەنتى ۆلاديمير پۋتين كەڭەس وداعىن قايتا قالىپتاستىرۋدى ارماندايدى. بۇل تۋرالى ۋكراينانىڭ پرەمەر- ءمينيسترى ارسەنيي ياسەنيۋك NBC تەلەارناسىنىڭ "Meet the Press" باعدارلاماسىنىڭ ەفيرىندە ايتتى، دەپ حابارلايدى Tengrinews.kz.
باعدارلامانىڭ جۇرگىزۋشىسى ديەۆيد گرەگوري ۋراينا پرەمەر مينيسترىنەن ءپۋتيننىڭ "ۋكرايندىقتار مەن ورىستار - ءتۇبى ءبىر حالىق. كەزىندە ۋكراينانىڭ وڭتۇستىك بولىگى "نوۆوروسسيا" دەپ اتالعان" دەگەن سوزىنە پىكىر ءبىلدىرۋدى سۇراعان بولاتىن. وسى ساۋالعا ياسەنيۋك "پۋتين كەڭەس وداعىن قايتا قالپىنا كەلتىرۋدى ارماندايدى. جانە كۇننەن كۇنگە وسى ويىن جۇزەگە اسىرعىسى كەلەدى. ونىڭ قاشان قالاي توقتايتىنى بەلگىسىز" دەپ جاۋاپ بەردى.
ايتا كەتۋ كەرەك پۋتين 2014 جىلدىڭ 18 ناۋرىزىندا فەدەرالدىق كەڭەستە سويلەگەن سوزىندە "ءتۇبى ءبىر حالىق" تۋرالى ايتقان بولاتىن. كەيىننەن 2014 جىلدىڭ 17 ساۋىرىندە تەلەكوپىردە "نوۆوروسسيا" تۋرالى ايتتى. ەستەرىڭىزگە سالا كەتەيىك، 2014 جىلدىڭ 17 ساۋىرىندە وتكەن ءداستۇرلى "تىكەلەي ەفيردە" پۋتين: "ۋكراينا داعدارىستان شىعۋ ءۇشىن ونىڭ ىشىندەگى ساياسي كۇشتەر ءبىر مامىلەگە كەلۋى كەرەك. ول ءۇشىن ەڭ الدىمەن ۋكراينانىڭ وڭتۇستىگى مەن شىعىس بولىگىندەگى حالىقتىڭ كوزقاراسىنا نازار اۋدارعاندارى ءجون. بۇل ايماق كەزىندە نوۆوروسسيا دەپ اتالعان. كەيىننەن بۇل ءوڭىر رەسەي قاراماعىنان كەتسە دە، ونداعى حالىق سول ايماقتى مەكەندەپ قالدى" دەگەن ەدى.
"ۋكراينا ۇكىمەت باسشىسىنىڭ ايتۋىنشا رەسەي كوشباسشىسىنىڭ ءوزى ويلاپ تاپقان ماقساتىنا جەتۋ ءۇشىن قانداي ارەكەتتەرگە باراتىنىن بەلگىسىز. ول كەڭەس وداعىنىڭ ىدىراۋىن XX عاسىردىڭ ەڭ ۇلكەن قاسىرەتى دەپ اتاعان بولاتىن. مەنىڭشە، ەگەر كەڭەس وداعى قايتا قالپىنا كەلەتىن بولسا، قازىرگى زاماننىڭ ەڭ ۇلكەن قاسىرەتى وسى بولماق"، دەيدى ياسەنيۋك.
