شەتتەن كەلگىسى كەلەتىن اعايىنعا ءبىر جىلدا ازاماتتىق بەرىپ، ەلىمىزدىڭ كەز كەلگەن ايماعىنا كوشىپ كەلۋگە تەڭ جاعداي جاسالاتىن بولىپتى.

قازاق كوشى تۋرالى تومەندەگى ويدى قامشى.kz پورتالىندا ايتقام. 

"قازاق كوشى قاڭتارىلىپ تۇرعانى راس. جانە بۇل وتە دۇرىس ەمەس دەپ ەسەپتەيمىن. بۇل جەر قازاققا تولماسا، باسقاعا تولادى. وسىنى قاپەرگە مىقتاپ ءتۇيىپ الىپ، شەتتەگى قازاقتى اتامەكەنگە ورالتپاي، ءىسىمىز وڭالمايىن دەپ تۇر. حالىقتىڭ كوپتىگى كوپتەگەن وڭ وزگەرىستەر اكەلەر ەدى.

بىرىنشىدەن، ايبىنىمىز ارتادى. ەكىنشىدەن، باسەكەلەستىك پايدا بولىپ، قوعامنىڭ ءار سالاسىندا حالىقتىڭ بەلسەندىلىگى كۇشەيەدى. باسەكە كۇشەيگەن جەردە ساپا پايدا بولادى، ت.ت. مەن جاقىندا كوشى-قون پوليسياسىنا ارنايى بارىپ، شەتتەن كەلگەن قانداستارىمنىڭ قانداي جاعدايدا دۋشار بولاتىن ءوز كوزىممەن كوردىم. ورىس ءتىلىن بىلمەيتىن قازاقتاردىڭ قۇجاتتارىن قابىلداپ وتىرعان ماماندار شۇلدىرلەپ، جەكىپ، ونىڭ ۇستىنە وتە مادەنيەتسىز سويلەسەدى ەكەن. ءتىپتى ادام دەپ ەسەپتەمەيدى. سوعان كوزىم جەتتى. قاتتى ىزالاندىم. جاتقان دا قاتقان بيۋروكراتيا! انا قاعازدى اكەل، مىنا قاعازدى اپار، ارى تۇر، بەرى تۇر، كەلە بەرمە، پالەن-تۇگەن دەگەن قوجاڭداعان قىزمەتكەرلەردى كورىپ-ەستىپ تۇرىپ، وسى ەلدىڭ ازاماتى بولا تۇرا قاتتى قورلاندىم جانە سۇمدىق ۇيالدىم. وۋ، اتامەكەنىنە ءوز كۇشىمەن كەلىپ جاتقان باۋىرىڭدى قۇشاق جايا قارسى الىپ، كەرى قايتىپ كەتپەسىن دەپ بارىن سالىپ، ءبارىن ىستەۋ كەرەك قوي! دەمەك سونداي ورگانداردا ۇلتقا جانى اشىمايتىن، ءتىپتى مەملەكەتىمىزدىڭ الدىندا تۇرعان قاۋىپ-قاتەردەن بەيحابار، ستراتەگيالىق ويلاۋ قابىلەتى جوق باسشىلار وتىر دەگەن ءسوز! مەن ءتىپتى، شەتتەن كەلگەن قازاقتىڭ قۇجاتىن دەر كەزىندە جاساپ بەرمەي، كەرىسىنشە كەدەرگى كەلتىرەتىن مۇنداي قىزمەتكەرلەردى وتانىنا وپاسىزدىق جاساپ وتىرعان ادام دەپ بىلەمىن".