رەسەي "اڭىز ادام" ماسەلەسىن حالىقارالىق ساياسي قىسىم جاساۋ قۇرالىنا اينالدىرىپ وتىر. ارانداتۋدان ساق بولايىق.

ماعان ءار وبلىستان تەلەفون شالىپ، "مۇحتار شاحانوۆ "اڭىز ادام" جۋرنالىن قولداۋ توبىن قۇرامىز دەپ ەدى، سول توپقا قالاي مۇشە بولا الامىز؟ ءبىز ءوز وبلىسىمىزدا جۋرنالدى قولداۋ ميتينگىسىن وتكىزسەك قالاي بولادى؟ ميتينگى وتكىزۋ ءۇشىن رۇقسات سۇراۋ كەرەك پە؟" دەگەن سۇراقتار قويىپ جاتىر. "قازاق ءتىلىن بىلمەيتىن، جۋرنالدى وقىماعان ورىس شالدار مەن اكىمشىلىكتەن تەندەر الىپ جۇرگەن ابدىشۇكىروۆ، پاشيەۆيچ دەگەن بىرەۋلەر نەگە اۋعان سوعىسى ارداگەرلەرىنىڭ اتىنا كىر كەلتىرەدى؟ ولارعا جالپى اۋعان سوعىسى ارداگەرلەرىنىڭ اتىنان سويلەۋگە كىم قۇقىق بەردى؟ ولار الماتى قالاسىنىڭ ورتاسىندا رۇقسات ەتىلمەگەن، قارۋلى ميتينگ وتكىزسە، ءبىز دە ءدال سونداي ميتينگ وتكىزەيىك. سونىڭ ىشىندە بىرگە بولىڭىز، زاڭگەرلىك قولداۋ كورسەتىڭىز" دەگەن جىگىتتەر دە تابىلىپ جاتىر. ءقادىرلى ازاماتتار، باۋىرلار! قازاق باسپاسوزىنە عانا ەمەس، جالپى قازاقستان تاۋەلسىزدىگىنە ءقاۋىپ ءتونىپ وتىرعانى راس. ءبىراق، كوشەگە شىعىپ، ءورت شىعارىپ، توبەلەس ۇيىمداستىرۋ قازاققا ەمەس، ەڭ الدىمەن سول ارانداتۋشىلىقتى ۇيىمداستىرىپ وتىرعان رەسەيشىلدەرگە كەرەك. سوندىقتان ءسال سابىر ساقتاپ، رەسمي ورگانداردىڭ ارەكەتىنىڭ اۋجايىن بايقاپ كورەيىك. ءقازىر اراشا ءتۇسۋ ءۇشىن تەك پرەزيدەنتتىڭ اتىنا توپ-توپ بولىپ ءار وبلىستان حات جازۋعا بولادى. قوعامدىق ۇيىمدار بەلسەنە ات سالىسسا بولادى. زاڭ بۇزۋشىلىقتى ەڭ الدىمەن رەسمي ورگانداردىڭ وزدەرى باستاپ وتىرعانىنا قاراماستان، بارىنشا زاڭ شەڭبەرىندە ارەكەت ەتكەن ءجون. ال ەگەر شىنىمەن "اڭىز ادامدى" زاڭسىز جاۋىپ، جارىلقاپ قالىبايدى ق ر قىلمىستىق كودەكسىنىڭ 164-بابى بويىنشا ۇزاق مەرزىمگە باس بوستاندىعىنان ايىرۋ ءقاۋىپى تۋىنداسا، سول كەزدە جاپپاي شەرۋگە شىعۋ ماسەلەسىن كوتەرۋ كەرەك دەپ ويلايمىن. جاي عانا ءبىر جۋرنالدا شىققان ماقالانى، ياعني، بولىمسىز عانا وقيعانى ۇلكەن حالىقارالىق ساياسي ماسەلەگە اينالدىرىپ وتىرعان جارىلقاپ ەمەس، ەڭ الدىمەن رەسەي فەدەراسياسى. رەسەي سىرتقى ىستەر مينيسترلىگى ارنايى نوتا جىبەرۋ ارقىلى بىرىنشىدەن، تاۋەلسىز قازاقستاننىڭ ىشكى ىسىنە ارالاسىپ وتىر، ەكىنشىدەن جالعان اقپاراتتى ساياسي كۇش كورسەتۋ قۇرالىنا اينالدىردى. سوندىقتان، ارانداتۋدان ساق بولىپ، ساياسي دا، قۇقىقتىق تا ساۋاتتى ارەكەتتەر جاسايىق دەگىم كەلەدى.

ماقسات ءىلياس ۇلى، زاڭگەر