قازاقستاندىق زاڭگەردىڭ شاعىمى بويىنشا رەسەيدىڭ تەرگەۋ كوميتەتى ۆلاديمير جيرينوۆسكييگە قاتىستى تەكسەرۋ جۇرگىزەدى، - دەپ حابارلايدى Tengrinews.kz ءتىلشىسى قۇقىق قورعاۋشى اسقار قايماقوۆتىڭ وزىنە سىلتەمە جاساپ.

جيرينوۆسكييدى رەسەيدەگى وتان قورعاۋشى كۇنىنە ارنالعان ميتينگتە سويلەگەن ءسوزى ءۇشىن قىلمىستىق جاۋاپكەرشىلىككە تارتۋدى سۇراعان قازاقستاندىقتىڭ حاتى اقپان ايىنىڭ سوڭىندا جولدانعان. ەكى ايدان سوڭ زاڭگەرگە "شاعىمىڭىز تەرگەۋالدى تەكسەرۋ جۇرگىزۋ ءۇشىن رەسەيدىڭ تەرگەۋ كوميتەتىنە جولداندى" دەلىنگەن جاۋاپ كەلدى.

قايماقوۆ جيرينوۆسكيي ءوزىنىڭ اتىشۋلى مالىمدەمەسى ءۇشىن رف قىلمىستىق كودەكسىنىڭ ءۇش بابى بويىنشا جازالانۋى كەرەك دەپ ەسەپتەيدى: "جەككورىنىشتى نەمەسە جاۋلاسۋدى تۋعىزۋ جانە ادامنىڭ ار-وجدانىن قورلاۋ"، "كوپشىلىكتى ەكسترەميستىك قىزمەتكە شاقىرۋ"، جانە "كوپشىلىكتى باسقىنشىلىق سوعىستى ورشىتۋگە شاقىرۋ". زاڭگەردىڭ ايتۋىنشا، ءوز سوزىندە جيرينوۆسكيي قازاقستاندى عانا ەمەس، وزگە ەلدەردى دە، سونىڭ ىشىندە، ۋكراينانى دا كەمسىتتى.

ەسكە سالايىق، بۇل مالىمدەمە ورتاازيالىق فەدەرالدىق وكرۋگ قۇرۋ تۋرالى بولاتىن. رەسەيدە وتان قورعاۋشى كۇنىنە ارنالعان ميتينگ كەزىندە لدپر جەتەكشىسى "ورتا ازيادا ەشقانداي رەسپۋبليكا بولعان جوق. ورتاازيالىق فەدەرالدىق وكرۋگ بولدى، باستى قالاسى - ۆەرنىي! ءقازىر قالانىڭ اتاۋى باسقا، الما-اتا - مەنىڭ تۋعان قالام. ونى ويلاپ تاپقان وزبەكستان، قىرعىزستان، تاجىكستان، تۇرىكمەنستان مەن قازاقستان. ورتاازيالىق فەدەرالدىق وكرۋگ!" - دەگەن بولاتىن جيرينوۆسكيي.

ق ر سىرتقى ىستەر مينيسترلىگى بۇل پىكىرگە بايلانىستى رەسەيدىڭ سىرتقى ساياسات ۆەدومستۆوسىنا نوتا جولدادى. كەيىن رف فەدەرالدىق جينالىسىنىڭ مەملەكەتتىك دۋماسى اپپاراتى جەتەكشىسىنىڭ ورىنباسارى يۋريي شۋۆالوۆ كەيبىر ساياساتكەرلەردىڭ مۇنداي پىكىرلەرىنىڭ رەسەي مەن قازاقستان اراسىنداعى قاتىناستارعا ەشقانداي اسەر ەتپەيتىنىن مالىمدەدى. tengrinews.kz