كەشە الماتىداعى مۇسىرەپوۆ اتىنداعى اكادەميالىق بالالار مەن جاستار تەاترىندا «ءدۇلدۇل ءان مەن پىراق كۇي» اتتى ءداستۇرلى مۋزىكا ونەرى كەشى بولىپ ءوتتى. كەشتى «ادىرنا» ۇلتتىق ەتنوگرافيالىق بىرلەستىگى ۇيىمداستىردى. بيىلعى جىل جىلقى جىلى. اتى ايتىپ تۇرعانداي كونسەرت ءار زامانداردا ۇلتىمىزدىڭ جىلقىعا ارنالعان ءان – كۇيىمەن ءوربىدى. جىلقى قازاقتىڭ قاناتى بولعان. ۇلتىمىز انمەن ارداقتاپ، كۇيمەن تايپالتقان جىلقى مالى باعزى زامانداردان باتىرلار سەرىگى، حالىق دوسى. كەش بارسىندا بابالاردىڭ مىنگەن تۇلپار ءدۇبىرى قايتا جاڭعىرىپ، ونەرپازداردىڭ قۇيقىلجىتا سالعان انىمەن، كۇمبىرلەتە توككەن كۇيىمەن اسپانعا قالىقتادى. دومبىرانىڭ ءۇنى، سىبىزعىنىڭ سازى قوسىلىپ، سال سەرىلەردىڭ ءانى اۋەلەي شىرقالعان دا زالدا رۋحتانباعان كورەرمەن قالمادى. كەشتە ۇلجان بايبوسىنوۆا، ايگۇل ۇلكەنبايەۆا، ابزال قۋانىش ۇلى، تالعات مۇقىش سىندى قازاقستاننىڭ ەڭبەك سىڭىرگەن ارتىستەرىمەن قاتار وقۋ وردالارىنداعى ءبىر توپ جاس ونەرپازدار ونەر كورسەتتى. كەشتى بەلگىلى ونەرتانۋشى ەرلان تولەۋتاي جۇرگىزدى. ءبىرجان سالدىڭ «بۋىرلتايى»، «ەكى جيرەنى»، كەنەننىڭ «كوكشولاق» ءانى شىرقالعاندا، «بوز ايعىر» كۇيلەرى شەرتىلگەندە ساحنادا تۇلپارلار كىسىنەپ وتكەندەي بولدى. كەش كورەرمەنى بولعان جۋرناليست ءاسيا باعداۋلەت قىزى كونسەرتتەن العان اسەرىن جاسىرماي «Facebook» جەلىسىندەگى پاراقشاسىنا بىلاي دەپ جازدى: «تاقىرىپ قانداي. جىلقى دەگەن قازاقتىڭ جانى ەكەن عوي. ءيمانجۇسىپتىڭ ازاماتتىعى، ءبىرجان سالدىڭ سالتاناتى، اقان سەرىنىڭ زار - مۇڭى، كەنەن مەن جاياۋ مۇسانىڭ قارسىلىعى، ساكەننىڭ سەرىلىگى جىلقىمەن بiرگە ءورىلىپتى-اۋ... ءبىر ەركىن شۇكىمان نەگە تاتيدى! ەركىن ءانىن اۋەلەتكەندە سەنىڭ جانىڭ دا (ونىڭ داۋسىنا ىلەسە السا) انتەك ءبىر بيىكتەپ، كەرەمەتتەي تازارىپ شىعا كەلەدى. ساحناداعى قاراپايىم دا بەكزات بولمىسىنا قاراپ، ەرىكسىز "قازىرگى تالاي ءانشىڭىز وسى كىسىنىڭ قولىنا سۋ قۇيۋعا جارامايدى-اۋ" دەگەن ويعا قالاسىڭ. ال رامازان ستامعازييەۆتىڭ قوڭىر داۋسى قوڭىر سامالداي جانىڭدى جۇقا عانا جەلپىپ، كوڭىلدىڭ پەرنەلەرىن ايالاي باسىپ وتەدى.»
كەشتى ۇيىمداستىرۋشى «ادىرنا» ۇلتتىق ەتنوگرافيالىق بىرلەستىگىنىڭ جەتەكشىسى ارمان اۋباكىر: «كوك تۇركىلەر دۇنيەنى دۇبىرلەتىپ، بۇكىل الەمدى وسى جىلقىلاردىڭ ارقاسىندا بيلەدى. جىلقى ارقىلى جاڭا وركەنيەتتى الىپ كەلدى. ءبىز دە سول جىلقىنى ناسيحاتتاۋ ارقىلى قازاقتىڭ رۋحىن كوتەرەمىز، ءوزىمىزدىڭ عۇرپىمىزدى، سالتىمىزدى ناسيحاتتاۋ ماقساتىندا وسى كەشتى ۇيىمداستىردىق. جىلقىعا قاتىستى ءتۇرلى اسپاپتا ورىندالاتىن سان-الۋان شىعارما بار. سولاردىڭ باسىن قوسىپ، كونسەرت وتكىزدىك. كونسەرت الداعى ۋاقىتتا جالعاسىن تاباتىن بولادى»- دەيدى.
اتالمىش كونسەرتتى «الماتى» تەلە ارناسى ءتۇسىردى. 1 مامىر مەرەكەسىنە وراي ەفيردەن كورسەتىلەتىن بولادى. قاپى قالماڭىزدار.
