سوڭعى كەزدە تەاتر توڭىرەگىندە جاعىمدى جاڭالىقتار مەن تىڭ باستامالار كوبەيىپ كەلەدى. سونداي شارالاردىڭ ءبىرى - م.اۋەزوۆ اتىنداعى قازاق مەملەكەتتىك اكادەميالىق تەاترىنداعى «سىرلاسۋ» ۇيىمىنىڭ اشىلۋى. «سىرلاسۋ» ۇيىمىنىڭ نەگىزگى ماقساتى تەاترعا كورەرمەندەردى، اسىرەسە جاستار جاعىن كوپتەپ تارتۋعا، كورەرمەن مەن تەاتر ۇجىمىنىڭ بايلانىسىن جاقسارتۋ.
كەشە م.اۋەزوۆ اتىنداعى قازاق مەملەكەتتىك اكادەميالىق تەاترىنداعى «سىرلاسۋ» ۇيىمى اكتەرلەرىمەن كەزدەسۋ وتكىزدى. كەزدەسۋگە بەلگىلى جاس ونەرپازدار: «سەرپەر» جاستار سىيلىعىنىڭ لاۋرەاتى الماس شاياحمەتوۆ پەن گۇلنۇر شىڭعىسوۆا قاتىسىپ، كورەرمەندەردىڭ سۇراقتارىنا جاۋاپ بەردى. رۋحاني اڭگىمە ءوربىپ، ارتىستەر كورەرمەنمەن وي ءبولىستى. اڭگىمە بارىسىندا «سەرپەر» جاستار سىيلىعىنىڭ لاۋرەاتى، اكتەر الماس شاياحمەتوۆ ءوزىنىڭ ومىرلىك ماقساتتارى تەاترمەن تىعىز بايلانىستى ەكەنىن ايتادى: «ءبىزدىڭ باستى ماقساتتارىمىز دا تەاترمەن بايلانىستى. «ەڭبەك ەتسەڭ ەرىنبەي، تويادى قارنىڭ تىلەنبەي» دەگەندەي، ەڭبەگىمىزدىڭ جەمىسىن كورىپ، تەاتردىڭ ارقاسىندا جەتىستىكتەرگە جەتىپ جاتىرمىز. كورەرمەندەرىمىز كوبەيە بەرسىن، قازاق تەاترى جاساسىن! ءبىز جاقسى، جارقىن وبرازداردىڭ ساحناعا الىپ شىعىپ، ويناۋعا بارمىز»، - دەيدى. 
ال، «ءبىر قويىلىمنىڭ دايىندىعىنا قانشا ۋاقىت كەتەدى؟» دەگەن كورەرمەن ساۋالىنا گۇلنۇر شىڭعىسوۆا: «تەاتر ساحناسىنا ءبىر قويىلىمدى شىعارۋ ءۇشىن كەمىندە 3-4 اي ۋاقىت ارنالادى. ەڭ الدىمەن، ءبىر اي ۋاقىت بويى پەسا تالدانادى، ارتىق-كەمى تۇگەندەلىپ، كەيىپكەرلەر بەلگىلەنەدى. 2-3 ايدا ساحناعا شىعىپ، دايىندالا باستايسا، سوڭعى ايى تولىق دايىندىققا ارنالادى"،- دەپ جاۋاپ بەردى.
«قاي قالاداعى تەاترلارعا ءجيى ات باسىن بۇراسىزدار» دەگەن كورەرمەن سۇراعىنا قوس اكتەردىڭ ويى ءبىر جەردەن شىققان سەكىلدى. ەكەۋى دە مۇمكىندىگىنشە وزگە تەاترلارداعى ارىپتەستەرىمەن ۇنەمى بايلانىستا ەكەنىن ايتىپ ءوتتى: «ءار تەاتردىڭ ەل رۋحانياتىندا وزىندىك ورنى بار، ءار قايسىسى وزىنشە قويادى. سوندىقتان، ع.مۇسىرەپوۆ اتىنداعى بالالار جانە جاسوسپىرىمدەر تەاترى مەن م. لەرمونتوۆ اتىنداعى ورىس مەملەكەتتىك اكادەميالىق تەاتردىڭ جاقسى قويىلىمدارىنا بارىپ تۇرامىز»، -دەدى.
ايتا كەتەر جايت، «سىرلاسۋ» ۇيىمىنىڭ مۇنداي كەزدەسۋدى العاش وتكىزىپ وتىرعان جوق. وسىعان دەيىن «سىرلاسۋدا» قوناقتا بەلگىلى اكتريسالار سالتانات باقايەۆا مەن باقتيار قوجا، قۇمان تاستانبەكوۆ پەن مەرۋەرت وتەكەشيەۆا بولعان ەدى.
تەاتردىڭ كورەرمەندەرمەن جۇمىس جاساۋ ءبولىمىنىڭ مەڭگەرۋشىسى تەاترتانۋشى سالتانات ابىلعازييەۆا اتالمىش شارا تۋرالى: «سىرلاسۋ» ۇيىمىنىڭ نەگىزگى ماقساتى تەاتر اكتەرلەرى مەن كورەرمەندەردىڭ اراسىندا التىن كوپىر بولۋ. ويتكەنى، اۋەزوۆ تەاترىنىڭ اكتەرلەرىمەن كەزدەسىپ، سۇحباتتاسىپ، سىرلاسۋ ول كۇندە قايتالانا بەرمەيتىن جايت. بۇل اكەمتەاتردىڭ كورەرمەندەرگە جاساعان ۇلكەن سىيى، جول اشۋى. بۇگىنگى كەزدەسۋ ەرەكشە ءوتتى. سەبەبى، ءان ايتىلدى. ارتىستەر كورەرمەندەرگە جاڭا قىرلارىمەن تانىلدى»، - دەپ شارانى قورىتىندىلادى.
