سءاۋىردىڭ 28ء-ى كۇنى استانادا "انتيگەپتيل" قوزعالىسىنىڭ 15 شاقتى مۇشەسى اقوردانىڭ الدىندا قارسىلىق اكسياسىن وتكىزدى. ازاتتىق ءتىلشىسىنىڭ حابارلاۋىنشا، بەلسەندىلەر رەسەيلىك "پروتون-م" زىمىران تاسىعىشتارىندا گەپتيل وتىنىنىڭ پايدالانىلۋىنا، ەندى قۇرىلعالى جاتقان ەۋرازيا ەكونوميكالىق وداعىنا، رەسەيدىڭ قىرىمدى اننەكسيالاپ الۋىنا قارسىلىقتارىن بىلدىرگەن حاتتارىن اقوردانىڭ الدىنداعى جاشىككە سالدى. نارازىلار بۇگىن بايقوڭىر عارىش ايلاعىنان "پروتون-م" زىمىران تاسىعىشىنىڭ كەزەكتى رەت ۇشىرىلۋىنا بايلانىستى قازاقستان پرەزيدەنتىنە سەنىمسىزدىك بىلدىرەتىنىندەرىن دە مالىمدەدى. بەلسەندىلەر حات سالعان سوڭ "سەنزۋراعا جول جوق!"، "ەۋرازيا وداعىنا جول جوق!" جانە "جاساسىن قىرىم!" دەگەن جازۋى بار پلاكاتتار كوتەردى. پلاكاتتاردى اشقان سوڭ بىرەر مينۋتتان كەيىن قاراۋىلداپ جۇرگەن پوليسيا بەلسەندىلەردى ارنايى كولىكتەرگە مىنگىزىپ، ەسىل اۋداندىق ىشكى ىستەر بولىمىنە الىپ كەتتى. بۇگىن تاڭەرتەڭ بايقوڭىردان قازاقستاندىق "قازسات-3" سپۋتنيگىن تىركەگەن "پروتون-م" زىمىران تاسىعىشى ۇشىرىلعان ەدى. زىمىران بۇل جولى رەسەيلىك بايلانىس سپۋتنيكتەرىن دە جەر وربيتاسىنا شىعارادى. قازاقستان 2006 جىلى "قازسات-1"، 2011 جىلى "قازسات-2" سپۋتنيگىن عارىشقا ۇشىرعان. قىزمەت ەتۋ مەرزىمى ون جىلعا جارامدى دەلىنگەن "قازسات-1" ەكى جىلدان كەيىن بۇزىلىپ قالعان. رەسەي 2014 جىلى بايقوڭىردان جيىرما شاقتى زىمىران تاسىعىش ۇشىرۋدى جوسپارلاپ وتىرعانى، ولاردىڭ جەتەۋى - «پروتون» ەكەنى بۇدان بۇرىن حابارلانعان. 2013 جىلى شىلدەنىڭ 2-سىندە رەسەيلىك ءۇش «گلوناسس» سپۋتنيگى تيەلگەن «پروتون-م» زىمىران تاسىعىشى بايقوڭىردان ۇشا بەرە اپاتقا ۇشىراپ، جارىلىپ كەتكەن ەدى. اپات ورنىنداعى زياندى زاتتاردىڭ شەكتىك كونسەنتراسياسى تۋرالى ەكى ەلدىڭ اقپاراتى ەكى ءتۇرلى بولعان. قازاقستاندىق مامانداردىڭ باعالاۋىنشا ول 660-تان 330-عا دەيىن، ال رەسەيلىك مامانداردىڭ ەسەپتەۋىنشە 130-دان 10-عا دەيىن تومەندەگەن. اپاتتان كەيىنگى ايلاردا قازاقستاندىق بەلسەندىلەر رەسەيدىڭ بايقوڭىردان گەپتيل قولداناتىن زىمىراندار ۇشىرماۋىن تالاپ ەتكەن بىرنەشە اكسيا وتكىزدى. كوپ ۇزاماي 2013 جىلعى شىلدە ايىندا استانالىق ءبىر توپ ەكولوگ پەن بەلسەندى "انتيگەپتيل" قوزعالىسىنىڭ قۇرىلعانىن جاريالاعان.

ازاتتىق راديوسى