ۇزىندىعى 7 جارىم مەتر بولاتىن امبەباپ اۋە كولىگى «اراي» دەپ اتالادى. ۇشاققا كانىگى مامانداردىڭ ءوزى جوعارى باعا بەرىپ وتىر. اسىرىسە تەحنيكالىق ەرەكشەلىكتەرى مەن باسقارۋ جۇيەسىنە. كوپشىلىككە تانىستىرىلا سالىسىمەن “اراي”-دى ساتىپ الۋعا نيەت قىلعان شەتەلدىكتەر دە تابىلدى. 

شەتەلدىڭ اۋە كولىكتەرىنە كۇنى قاراعان قازاق جۇرتىنىڭ بۇل بۇگىنگى ماقتانىشى. كۇن استىنداعى “ارايعا” بۇل كۇنى تامسانباعان جان جوق. بۇيىرىندە قازاقستاندا جاسالعان دەپ جازىلعان. قىزىقتاۋعا كەلگەندەر ءۇشىن قوزعالتقىشى تاڭ اتىسى، كەش باتىسى توقتاۋسىز وتالىپ تۇر. ءوز سالماعى 546 كەلى، سوعان قاراماستان 590 كەلىلىك جۇكتى كوتەرىپ كەتە بەرەدى ەكەن. ەندى اتى ءماشھۇر ان-2 ۇشاعىن نارىقتان سىرىپ تاستايدى دەدى بىلەتىندەر. قاراپايىم مىسال، ان-2 ساعاتىنا 300 ليتر جانارمايدى جۇتسا، بۇل بار-جوعى 35 ليتر بەنزين جاعادى.

دۋمان اقتايەۆ، باس ينجەنەر:

-قازىرگى جاسالعان ۇشاق اۆياحيم جۇمىستارعا ارنالعان. ۋنيۆەرسالدىق سامولەتتى جارتى ساعاتتىڭ ىشىندە قايتادان پاسساجيرلىككە قايتارۋعا بولادى. باكتارىندا ءبارىن الىپ تاستاۋعا بولادى، ءبىر ۇشاقتىڭ باعاسى 200 مىڭ دوللار.

ەگىستىكتى دارىلەۋگە، شەكارانى كۇزەتۋگە، كەز كەلگەن اۋماقتى اۋەدەن باقىلاۋعا تاپتىرماس تەحنيكانىڭ ۇشۋىنا 70 مەتر، قونۋىنا 90 مەتر قاشىقتىق جەتىپ جاتىر. جەر ءتۇزۋ بولسا بولدى. بۇل وسىمەن ءبىزدىڭ ماماندار قۇراستىرعان ءتورتىنشى ۇشاق. ۇشەۋى ءقازىر سولتۇستىك قازاقستاندا قىزمەتتە كورىنەدى. 4200 مەتر بيىكتىككە دەيىن كوتەرىلەتىن “ارايدىڭ” قابىلەتىنە ۇشقىش تا ءدان ريزا.

ۆلاديمير انسۋپوۆ، ۇشقىش:

- بۇل ۇشاقتىڭ قاناتتارى ۇزارعان، جەردەن نەعۇرلىم بيىكتەگەن. الدىڭعى ءۇش ۇشاقتان گورى الدەقايدا سەنىمدى ءارى جىلدام. اۋەدە كەز كەلگەن بۇيرىقتى تەحنيكالىق تۇرعىدا كەدەرگىسىز ورىندايدى. بۇل ءوزى تەكتەس اۋە كولىكتەرىنىڭ ىشىندە ەڭ مىقتىسى، مۇنى مامان رەتىندە ايتا الام.

ەلىمىزدە ءقازىر ەگىن سالۋمەن اينالىساتىن مىڭداعان شارۋاشىلىق بار. سولارعا تاپتىرماس قۇرال بولماق. ويتكەنى 25 پايىز اقىسىن تولەپ قالعانىن نەسيەگە السا بولادى.

-قازاق ەلى ۇشاق شىعارادى دەگەندى ەستىگەندە الىس-جاقىن شەتەلدىڭ تاڭدانىپ تاڭداي قاققانى ايتپاسا دا تۇسىنىكتى. سودان بولار بۇگىنگى سىناقتىق ۇشۋ الاڭىنا ءوزىمىزدىڭ جانە وزگە ەلدىڭ ءتىسقاققان ماماندارىنىڭ ءتورت كوزى تۇگەل جينالىپتى. ەگەر اۋزى-مۇرنىنان شىعارىپ جانارماي قۇيساڭىز 1200 شاقىرىمدى توقتاۋسىز باعىندىراتىن بۇل وتاندىق اۋە كولىگى ءقازىر تاپسىرىس بەرۋشىلەرىن كۇتىپ تۇر. ەگەر ناقتى تاپسىرىس تۇسسە ماماندار بۇل ۇشاقتى 3 ايدىڭ ىشىندە قۇراستىرىپ بەرۋگە مۇددەلى.

"كتك" ارناسى