بيىل 150 جىلدىعى ەل كولەمىندە اتالىپ جاتقان الاش ارىسى ءاليحان بوكەيحاننىڭ ەسىمى قاراعاندى قالاسىنىڭ ءبىر اۋدانىنا بەرىلەتىن بولدى، - دەپ حابارلايدى Qamshy.kz.

بۇل تۋرالى ءسۇيىنشى حابارمەن قاراعاندى وبلىسىنىڭ اكىمى نۇرمۇحامبەت ابدىبەكوۆ مەرەيتويلىق جيىندا بولىسكەن.

«ءقادىرلى اعايىن! ەڭ الدىمەن، سىزدەردى الاش قوزعالىسىنىڭ كوسەمى، ارداقتى ارىسىمىز ءاليحان بوكەيحاننىڭ 150 جىلدىق مەرەيتويىمەن شىن جۇرەكتەن قۇتتىقتايمىن!
ءاليحان نۇرمۇحامەد ۇلى – ەل ەركىندىگى ءۇشىن كۇرەس جولىندا ماڭگى ولمەيتىن ءىز قالدىرعان، بار عۇمىرىن قازاق حالقىنىڭ ۇلتتىق ساياسي بوستاندىعى مەن دەربەستىگىنە ارناعان ۇلى تۇلعا. الاش ىنتىماعىنىڭ، ۇلىلىعى مەن قۋاتتىلىعىنىڭ دىڭگەگى. ۇلت مايەگى. ماڭگىلىك سوعار جۇرەگى دەپ ايتۋعابولادى.
ال الاش كوسەمىنىڭ ءومىر بويعى ۇستانعان: «ءتىرى بولسام قازاققا قىزمەت قىلماي قويمايمىن» دەگەن قاعيداسى بۇگىنگى ۇرپاققا ۇلكەن ونەگە. 
الداعى ۋاقىتتا قاراعاندى وبلىسىنىڭ ورتالىعىندا ءاليحان بوكەيحاننىڭ ەسكەرتكىشىن ورناتۋ، قاراعاندىداعى ءبىر اۋداننىڭ اتىن الاش ارىسىمەن اتاۋ جوسپارلانىپ وتىرعانىن قۋانىشپەن جەتكىزگىم كەلەدى. سونىمەن قاتار، قاراعاندى وبلىسى اكىمدىگىنىڭ قولداۋىمەن تۇڭعىش رەت ءاليحان بوكەيحاننىڭ تولىققاندى 15 تومدىعى جارىق كورەدى. مەنىڭ قولىمدا ءقازىر العاشقى 2 تومى. جالعاسىن ءالى دە تاباتىن بولادى. 
ارينە، بۇل كەلەشەك ۇرپاقتى ۇلتتىق مۇراتقا تارتۋدىڭ، وتانسۇيگىشتىككە تاربيەلەۋدىڭ بىردەن-بىر جولى دەپ بىلەمىن. ەڭ باستىسى بۇل — كوپتىڭ تىلەگى»، - دەپتى ن. ابدىبەكوۆ.