قازاقستان زاڭناماسىندا «حالال» تەرمينىنە قاتىستى تۇسىنىك تە، انىقتاما دا جوق. سوندىقتان ول زاڭنامالىق تۇرعىدا بەكىتىلۋى شارت، دەپ ەسەپتەيدى ق ر تۇتىنۋشىلار قۇقىعىن قورعاۋ اگەنتتىگىنىڭ ءتوراعاسى بولاتبەك قۋاندىقوۆ.

«ءبىزدىڭ نورماتيۆتىك-قۇقىقتىق بازادا «حالال» تەرمينىنە قاتىستى تۇسىنىك تە، انىقتاما دا جوق. زاڭنامادا مۇلدەم جوق. دەگەنمەن، ءدىني قوعامدىق ۇيىممەن قابىلدانعان حالال ءونىمىن ءوندىرۋ جانە ساتۋ تۋرالى ەرەجە بار. سونىڭ نەگىزىندە سەرتيفيكاتتار بەرىلۋدە. ول زاڭنامالىق تۇرعىدا بەكىتىلمەگەندىكتەن، ول بويىنشا مەملەكەتتىك نورماتيۆتىك-قۇقىقتىق اكتىلەر بولماعاندىقتان، اگەنتتىك ق ر باس پروكۋراتۋراسىنا حالال ءونىمى دەگەن ۇعىمعا قۇقىقتىق باعا بەرۋگە قاتىستى ساۋال تاستادىق. يندۋستريا جانە جاڭا تەحنولوگيالار مينيسترلىگىنە، ءدىن ىستەرى اگەنتتىگىنە حات جولدادىق. مۇندا ناقتى بەلگىلەنگەن شارتتار بولۋ كەرەك دەپ ەسەپتەيمىز. ول زاڭنامالىق تۇرعىدا بەكىتىلىپ، حالال كريتەرييلەرى ناقتى كورسەتىلۋى شارت، سودان كەيىن نارىققا شىعارىلۋى ءتيىس»، - دەدى ول بۇگىن استانادا ق ر پرەزيدەنتى جانىنداعى ورتالىق كوممۋنيكاسيالار قىزمەتىندە وتكەن بريفينگتە.

ونىڭ ايتۋىنشا، قازاقستاندا حالال دەگەن تۇسىنىك زاڭدىق تۇرعىدا نەگىزدەلمەگەندىكتەن، تۇتىنۋشى سوتتا ءوز قۇقىقتارىن قورعاي الماۋى ىقتيمال.

«ەشكىم حالال نە ەكەنىن تۇسىنبەيدى. سوت ونىڭ حالال نەمەسە حالال ەمەس ەكەندىگىنە قاتىستى شەشىم شىعارا المايدى. سوندىقتان بارلىعى قۇقىقتىق ايانىڭ ىشىندە بولۋى كەرەك. ول ەرتەڭ تۇتىنۋشى قورعالۋى ءۇشىن قاجەت. قازىرگى ۋاقىتتا «حالال» شۇجىقتار كوپتەپ شىعىپ جاتىر. ونى قويشى، بۇگىندە «حالال» قوناقۇيلەر پايدا بولعان. جاقىندا ينتەرنەتتەن وقىدىم، الىس شەتەلدەن كەلگەن مەيمان قازاقستاندا «حالال» كولىك جوندەۋ ستانساسىن كورگەندە تاڭعالىپتى. مۇنداي الجاسۋلار بولماس ءۇشىن، زاڭعا ەنگىزۋىمىز شارت»، - دەيدى ول.

inform.kz