قازاقستاندىق عالىم، ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورى عىلىم مەن تەحنولوگيا سالاسىنداعى يسلامدىق ISESCO سىيلىعىنىڭ يەگەرى اتاندى، - دەپ حابارلايدى Qamshy.kz ۋنيۆەرسيتەتتىڭ باسپا ءسوز قىزمەتىنە سىلتەمە جاساپ.

ءبىلىم بەرۋ، عىلىم مەن مادەنيەت بويىنشا يسلامدىق ۇيىمنىڭ حالىقارالىق سىيلىعى (ISESCO) ۇيىمعا مۇشە مەملەكەتتەردىڭ عالىمدارىنا بيولوگيا، حيميا، گەولوگيا، ماتەماتيكا، فيزيكا جانە عىلىمي تەحنولوگيالار سالاسىنا سىڭىرگەن عىلىمي-يننوۆسيالىق ەڭبەگى ءۇشىن ەكى جىلدا ءبىر رەت تاعايىندالادى. سىيلىقتىڭ قۇرامىنا سەرتيفيكات، التىن مەدال مەن اقشالاي سىياقى كىرەدى.

«بيىل ماتەماتيكالىق مودەلدەۋ مەن تەحنيكالىق جانە الەۋمەتتىك-ەكونوميكالىق جۇيەلەردى باسقارۋدا سىڭىرگەن ەرەن ەڭبەگى ءۇشىن بەدەلدى ماراپاتقا قازاقستاندىق عالىم، ءال-فارابي اتىنداعى قازۇۋ رەكتورى، اكادەميك عالىم مۇتانوۆ يە بولدى. اتالمىش ماراپات ع.مۇتانوۆتىڭ عىلىمي قىزمەتىنىڭ حالىقارالىق دارەجەدە ەكەنىنىڭ دالەلى»، - دەلىنگەن باسپا ءسوز قىزمەتى تاراتقان حابارلامادا.

ISESCO «يسلامدىق كونفەرەنسيا» ۇيىمىمەن 1979 جىلى قۇرىلعان بولاتىن. بۇگىندە ول الەمنىڭ 50-دەن اسا مەملەكەتىنىڭ باسىن بىرىكتىرىپ وتىر. حالىقارالىق ۇيىمنىڭ قىزمەتى مۇسىلمان مەملەكەتتەرىندەگى مادەنيەتتىڭ، عىلىم مەن ءبىلىمنىڭ دامۋىنا جان-جاقتى قولداۋ كورسەتۋگە باعىتتالعان.