كوپ جىلدان بەرى ءال-فارابي اتىنداعى قازاق ۇلتتىق ۋنيۆەرسيتەتىمەن بىرلەسىپ جۇمىس جاساپ كەلە جاتقان كولۋمبيا ۋنيۆەرسيتەتىنىڭ تاريحشىسى رافيس ابازوۆ ۆاتيكاننىڭ قۇپيا مۇراعاتتارىنان قازاقستاننىڭ بەلگىسىز كارتالارىن تاپتى.

رافيس ابازوۆ «ريم جانە الاش: مادەني مۇرا» عىلىمي جوباسىنىڭ اياسىندا مۇراعاتتاردى زەرتتەۋگە شاقىرىلعان بولاتىن.

بۇل جوبانى جۇرگەنوۆ اتىنداعى قازاق ۇلتتىق ونەر اكادەمياسىنىڭ رەكتورى، PhD دوكتور اندرەي حازبولاتوۆ جانە «يتاليا» ءبىلىم بەرۋ ورتالىعىنىڭ ديرەكتورى، يتاليان ءتىلىن وقىتۋشى كارمينە باربارو بىرلەسە  جۇزەگە اسىرىلعان.

عالىمدار رەسەي يمپەرياسىنىڭ ەۋرازيانىڭ كوشپەلى تايپالارىمەن، سونىڭ ىشىندە قازاقتارمەن ءوزارا بايلانىسىنا قاتىستى دالەلدەر تابۋعا ۇمىتتەندى. قۇپيا مۇراعاتتاردى زەرتتەۋ كەزىندە قازاقستان اۋماعىنا قاتىستى كارتالار تابىلدى.

«مەنىڭشە، بۇل تابىلعان دەرەكتەر قازاق مەملەكەتتىلىگىنىڭ ناقتى گەنەزيسى مەن دامۋ ديناميكاسىن تۇسىنۋگە كومەكتەسەدى. قازىرگى قازاق مەملەكەتتىلىگى 16-17 عاسىرلاردا پايدا بولدى دەپ سانالادى جانە تاريحشىلاردا سول كەزدەگى قازاق تايپالارىنىڭ سىرتقى الەممەن بايلانىسى جايلى مالىمەت از. سونىمەن بىرگە، عالىمدار ولاردىڭ جۇڭگو جانە رەسەيمەن قارىم-قاتىناسىنا ەرەكشە نازار اۋدارادى. الايدا بۇل كارتالار قازاق حالقىنىڭ بيلەۋشىلەرى سىرتقى الەممەن بايلانىستى كەڭىنەن ورناتۋى، وڭتۇستىك ازيا ، ءتىپتى باتىس ەۋروپاعا دەيىن بايلانىس جاساۋى مۇمكىن ەكەنىن ايعاقتايدى»، - دەيدى ابازوۆ.

ۆاتيكاننىڭ قۇپيا مۇراعاتتارىنا رۇقسات الۋ وڭاي ەمەس، ابازوۆتىڭ قۇجاتتارمەن جۇمىس ىستەۋگە رۇقسات الۋ ءۇشىن ءبىر جىل كۇتۋىنە تۋرا كەلگەن. تابىلعان كارتالار شامامەن 16-17 عاسىرلارعا تيەسىلى. سونىمەن بىرگە، عالىم ريم پاپاسىنىڭ تاتار-موڭعولداردىڭ حانىنا جازعان حاتتارىن تاپتى.