قازاقستان جاۋىنگەرلەرى 14-ساۋىردەن باستاپ استاناداعى «قا­زاق ەلى» ەسكەرتكىشى الدىنداعى الاڭدا بولاتىن اسكەري شەرۋگە قىزۋ دايىندالىپ جاتىر. شەرۋ 7-مامىرداعى وتان قورعاۋشىلار كۇنىنە وراي وتكىزىلەدى. ەلىمىزدىڭ ابىرويىن اسقاقتاتاتىن وسىناۋ شاراعا 2 مىڭعا جۋىق جاياۋ اسكەر قاتىسقالى وتىر. 

ولاردىڭ تورتتەن ءۇشىن قازاقستان قارۋلى كۇشتەرىنىڭ جاۋىنگەرلەرى قۇرايدى. اسكەري سالتاناتتىڭ اجارىن كىرگىزۋ ءۇشىن، استاناعا باسقا وڭىرلەردەن 250-گە جۋىق سوعىس تەحنيكاسى جەتكىزىلگەن. سونىمەن قاتار 56 ۇشاق پەن تىكۇشاق ساربازدار ساپ تۇزەگەن الاڭنىڭ اسپانىندا سامعاماق. اسكەري كولوننانى باسقارۋعا 566 ادامنان قۇرالعان ەكيپاجدار، جۇرگىزۋشىلەر، مەحانيكتەر، دەسانتتار توبى قۇرىلدى. ولار اسكەري شەرۋ كەزىندە وزدەرى وتىرعان كولىكتەر مەن تەحنيكالاردىڭ تۇت­قاسى مەن تىزگىنىن ۇستايدى. بۇل اسكەري شەرۋدىڭ بۇرىنعىلاردان ەرەك­شەلىگى – وعان جاڭا ­زاماناۋي تەحنيكالار قاتىستىرىلىپ، كوپشى­لىككە تانىستىرىلادى. قور­عانىس مينيسترلىگىنىڭ حابارلاۋىن­شا ولاردىڭ اراسىندا وتاندىق ءوندىرىس ورىندارى شىعارعان اسكەري تەحنيكالار دا بار. كۇندەلىكتى اسكەري دايىندىق 4-5 ساعاتقا سوزىلادى. 200 ادامنان قۇرالعان وركەستردىڭ سۇيەمەل­دەۋىمەن جاۋىنگەرلەردىڭ ساپ تۇزەۋى، ءجۇرىس-تۇرىسى، اياق الىسى ءجىتى باقى­لاۋعا الىنىپ، ساربازدار شاشاۋ شىعارمايتىنداي دايىندىققا كەلتىرىلدى. تاۋەلسىز قازاقستان ارمياسى­نىڭ قۋات-كۇشىن، ايبىنىن پاش ەتە­ءتىن بۇل سالتاناتتى شاراعا قور­عانىس مينيسترلىگىنىڭ، ىشكى ءىس­تەر مينيسترلىگىنىڭ، توتەنشە جاع­دايلار مينيسترلىگىنىڭ، ۇلتتىق ءقاۋىپ­سىزدىك كوميتەتى شەكارا قىزمەتىنىڭ جانە رەسپۋبليكالىق ۇلاننىڭ قۇرىلىمدارى قاتىسادى. اسكەري شەرۋدىڭ ايباتىن اسىرۋ ءۇشىن ەلىمىزدىڭ ءار تۇكپىرىندەگى بولىمشەلەردەن كەڭ جاۋىرىندى، ۇزىن بويلى، قيمىل-قوزعالىسى شيراق جىگىتتەر ىرىكتەلگەن. سونىمەن بىرگە اسكەري شەرۋگە قاتىسۋ ءۇشىن دەنە دايارلىعى مەن مورالدىق-پسيحولوگيالىق رۋحى مىقتى سەكسەن بەس  قىز-كەلىنشەك تاڭداپ الىنعان. اسكەري شەرۋ قورعانىس مي­نيسترلىگىنىڭ 2014 جىلعا ارنال­عان بيۋدجەتى ەسەبىنەن قارجى­لان­دىرىلىپ وتىر. ال سالتاناتتى شەرۋ بولاتىن كۇنى استانا قالا­سىنىڭ ءبىرقاتار كوشەلەرىندەگى كولىك قوزعالىسى توقتايتىنى الدىن الا حابارلاندى. اسكەري شەرۋ كەڭەس وكىمەتى 1945 جىلى نەمىس اسكەرىن تولىق تالقانداعاننان سوڭ جىل سايىن وتكىزىلەتىن تۇراقتى داستۇرگە اينالدى. سونىمەن بىرگە مۇنداي شە­رۋ ءىرى-ىرى اسكەري جاتتىعۋلاردان كەيىن دە وتكىزىلەدى. قازاقستانداعى ءىرى كولەمدەگى تۇڭعىش اسكەري شەرۋ 1992 جىلدىڭ 7-مامىرىندا بولدى. العاشقى اسكەري شەرۋدى قازاقستاننىڭ تۇڭعىش قورعانىس ءمينيسترى، حالىق قاھارمانى، كەڭەس وداعىنىڭ باتىرى ساعادات نۇرماعامبەتوۆ قابىلدادى. ال ەڭ ءىرى اسكەري شەرۋ بىلتىر ءوت­كەن بولاتىن. 2013 جىلدىڭ 7-ما­مىرىنداعى اسكەري شەرۋدىڭ ورنى رەتىندە وتارداعى 40-ىنشى اسكەري بازا پوليگونى تاڭدالىپ، وعان 7 مىڭعا جۋىق جاۋىنگەر، 500-دەن اسا اسكەري تەحنيكا جانە 86 ۇشاق پەن تىكۇشاق جۇمىلدىرىلدى. ونى تاماشالاۋعا الىس-جاقىن ەلدەردەن كوپتەگەن قوناقتار كەلگەن ەدى. جاۋىنگەرلەردىڭ سانى دا، اسكەري تەحنيكالاردىڭ سانى دا وتكەن جىلعىدان از. ­دەسەك تە، جوعارىدا ايتقانداي ءاس­كەري تەحنيكالارىمىزدىڭ ساپاسى جاقساردى. وعان قوسا جاۋىن­گەرلەرىمىزدىڭ دە رۋحى كوتەرىلدى دەپ ويلايمىز. ويتكەنى ساربازداردىڭ كوبى تاۋەلسىزدىكپەن قۇرداس جانە تاۋەلسىزدىك العاننان كەيىن ومىرگە كەلگەن بۋىندار. سوندىقتان بۇگىنگى جاۋىنگەرلەردىڭ الىمى دا، قارىمى دا بۇرىنعىلاردان الدەقايدا جوعارى.

بەيبىت نالىبايەۆ