"ۇلى وتان سوعىسىن" اتاپ ءوتۋ ءداستۇرى بۇگىنگى بيلىكپەن بىرگە قۇردىمعا كەتەدى. ويتكەنى، ەل باسقاراتىن كەلەسى بۋىن وعان قارجى ءبولۋدى، اقشانى تەككە شاشۋ، كەلمەسكە كەتكەن يمپەريانىڭ جەتىستىگىن جىرلاۋ دەپ قابىلدايدى. ءدال سولاي بولارىنا كامىل سەنىمدىمىن. بۇل مەرەكەنى كەڭەس وداعىنىڭ بىردەن-بىر مۇراگەرى سانالاتىن رەسەي يمپەرياسى ءوزىنىڭ «وداقتاستارىنا» كۇشتەپ تانىپ وتىر. سوندىقتان، «نوستالگيامەن» ءومىر سۇرەتىن بيلىكتەگى كوممۋنيستەر ودان باس تارتۋعا جول بەرمەيدى. بۇرىن 9 مامىردى سوڭعى ارداگەر قالعانشا تويلايتىن «شارتتى مەرەكە» شىعار دەپ ويلاۋشى ەدىم. ءبىراق، سول سولداتتاردىڭ قولىمەن ءوت كوسەگەن كوممۋنيستەرگە ارداگەرلەردىڭ قاتارى سيرەپ بارا جاتقانى دا قاجەت ەمەس ەكەنىنە كوزىم جەتتى. بۇل ەڭ الدىمەن، سونداي الىپ يمپەريانىڭ ىدىراپ كەتكەنىنە ءالى كۇنگە دەيىن بارماق تىستەيتىندەردىڭ باس مەرەكەسى. ءپۋتيننىڭ وسىعان بايلانىستى بىلاي دەپ وكىنگەنى بار: «سوۆەت وداعىنىڭ ىدىراۋى- XX عاسىرداعى ەڭ ۇلكەن گەو-ساياسي اپات بولدى».  ال، بۇيرىققا باعىنىپ، سىن ساعاتتا سوعىسقا سۇرانىپ، «وتاندى» قورعاۋعا اتتانعان ەرجۇرەك جاۋىنگەرلەرگە مەنىڭ قاي-قاشاندا قۇرمەتىم شەكسىز. ولار وزىنە جۇكتەلگەن ميسسيانى ارتىعىمەن ورىندادى. سوندىقتان ارداگەرلەرگە قۇرمەت كورسەتەيىك. ولار وزدەرىنىڭ "بەكەر سوعىسقانىن" بىلمەي ءوتسىن.

  ايتپاقشى، كوممۋنيستىك ەستافەتانى ۇزگىسى كەلمەگەن شوۆينيستەر «بەسسمەرتنىي پولك» دەپ اتالاتىن تاعى ءبىر باستاما ويلاپ تاۋىپتى. ەندى الداعى بىر-ەكى جىلدا ارداگەرلەردەن كوزى ءتىرى ەشكىم قالمايدى. ءبىراق، ولاردىڭ ورنىنا بالالارى مەن نەمەرەلەرى شەرۋگە شىعىپ، جەڭىس مەرەكەسىن اتاپ ءوتۋدى ارى قاراي جالعاستىرا بەرمەكشى. الماتىنىڭ اكىمدىگى بۇل يدەيادان بىردەن باس تارتىپتى. ءبىراق، اكسيا ەلىمىزدىڭ باسقا قالالارىندا ءوتىپ جاتىر. بۇل ۆيرۋسقا قازىردەن باستاپ تىيىم سالماساق، اقىر زامانعا دەيىن جەڭىس مەرەكەسىمەن جەلىگىپ جۇرە بەرەمىز...

جولىمبەت ماكىشيەۆ

تاۋەلسىز جۋرناليستەر قاۋىمداستىعىنىڭ پرەزيدەنتى