بۇگىن الماتىدا قىلمىستىق ورتادا «ماما روزا» دەگەن لاقاپ اتپەن بەلگىلى ولگا حامبۋلاتوۆا ەسىمدى «جەڭگەتاي» زاڭ الدىندا جاۋاپ بەرۋدە. بۇل تۋرالى قالالىق سوتتىڭ باسپا ءسوز قىزمەتكەرى قۋاندىق ەشىمەت حابارلادى. 

وتىرىس ارنايى اۋدانارالىق قىلمىستىق ىستەر بويىنشا مامانداندىرىلعان سوتىندا وتۋدە. ءىستى سۋديا ەرلان بولاتوۆ قاراپ جاتىر. ءدال ءقازىر ايىپتالۋشىدان سۇراق-جاۋاپ الىنۋدا. قۋاندىق ەشىمەتتىڭ ايتۋىنشا، ولگا حامبۋلاتوۆا جەزوكشەلەر قىزمەتىن كورسەتەتىن جاسىرىن ۇيىمدا «جەڭگەتايلىق» ەتكەن. «جەزوكشەلەر ورداسىن» قۇرۋعا وعان المالى اۋداندىق ىشكى ىستەر باسقارماسى باسشىسىنىڭ بۇرىنعى ورىنباسارى سەرىك بەگاسىلوۆ كومەكتەسكەن دەگەن كۇدىك بار. مەملەكەتتىك ايىپتاۋشىلاردىڭ ايتۋىنشا، ولار 8 ادامنان تۇراتىن قىلمىستىق توپ قۇرعان. «جەدەل شارالار باستالعان كەزدە بەگاسىلوۆ «ماما روزانى» الدىن الا قۇلاقتاندىرىپ قويعان. ولار پاتەردى اۋىستىرىپ ۇلگەرگەن. سوندا دا قىلمىستىق توپ مۇشەلەرى اقىلبەك، تەمىرحانوۆا، سالىقبايەۆا، لارين، مويسەيەۆ، چەليۋك ۇستالدى. ءقازىر ولارعا قاتىستى ق ر قك 232 بابىنىڭ 3 تارماعى، 28 بابىنىڭ 5 تارماعى، 231 بابىنىڭ 3 تارماعى، 37 بابى بويىنشا قىلمىستىق ءىس قوزعالدى. ەگەر ولاردىڭ ايىپتارى دالەلدەنسە، 15 جىلعا دەيىن باس بوستاندىقتارىنان ايىرىلۋلارى مۇمكىن»، - دەدى قۋاندىق ەشىمەت.