تۇرىكتەن تۇرپىدەي جيىرىلامىز. ۇيعىر دەسە ىرشىپ تۇسەمىز. وزبەكتەن ولەردەي قاشامىز. قىرعىزدى قىر اسىرامىز. قاراقالپاق قاس دۇشپاننان ارى. تاتار تۇلعا ەمەس. باشقۇرت پەن نوعاي قۇلدان تومەن. اراب تۋرالى ايتپاعانىمىز ابزال. ءبىز نەگە وندايمىز؟ سوندا بىزگە كىم دوس؟ الدە، عاسىرلار بويى ەۋرازيا كىندىگىندە ەركىن جورىتقان اتا-بابا قاعاناتىنىڭ شاڭىراعىن ورتاسىنا تۇسىرگەن ورىس دوس پا؟ التىن وردانى ىدىراتىپ، ۇساق حاندىقتاردى بىر-بىرىنە ايداپ سالىپ تالقانداعان رەسەي يمپەرياسى - ءتۇركى تىلدەس مەملەكەتتەردىڭ باسىن ءومىر-باقي قوسپاۋدىڭ امالىن ءالى جۇرگىزىپ كەلەدى. وتە ءساتتى ساياسات. ءسىبىر حاندىعىن، التىن وردا استاناسى سارايشىقتى، قازاندى، قاجى-تارحاندى، قىرىمدى دا ءدال وسىنداي قيتۇرقى، ەكىجۇزدى ساياساتپەن جەر بەتىنەن جوق ەتتى. قايتادان تۇرماستاي تۋا شوكتىردى. ءوزىمىزدىڭ جونىمىزدان كەسىپ جاساعان قارعىباۋدى موينىمىزعا مىقتاپ سالىپ، ايتقانىنا جۇرگىزدى. قاجەت كەزىندە قانداس-باۋىرلارىمىزعا قارسى يت بولىپ ۇرگىزدى. ءالى ءۇرىپ كەلەمىز. ءبىراق ءقازىر موينىمىزدا بۇرىنعىداي قارعىباۋ جوق. اللا ساقتاسىن، ەرتەڭ ۋكرايناداعىداي سىناق ءبىزدىڭ دە باسىمىزعا تۋسا - ۇيعىر مەن تۇرىك، وزبەك پەن تاتار كىمنىڭ ءسوزىن سويلەيدى؟ باۋىرىڭ باۋىرىنا الىپ تۋلاسا قايتەمىز؟ شەتتەتىپ، كوزگە شۇقىعاننان ءقازىر بىزدەگى ۇيعىر مەن تۇرىك، تاتار مەن نوعاي قازاقشا سالەمدەسپەيدى. بارىنشا ورىسشا شۇلدىرەۋگە بەيىم. تەك، وزبەك پەن قىرعىز عانا بۇيرەگىن بۇرىپ تۇرادى. ءبىر جەڭنەن قول، ءبىر جاعادان باس شىعارۋ ءۇشىن - سان عاسىرلار بۇرىن ەنشى بولىسكەن اعايىندارىمىزدى قايتا باۋىرعا تارتايىق. وزگە ەلدە ەكەندىكتەرىن ەسكە سالىپ، وگەيسىتپەيىك. سوندا ءبىز 10 ميلليون ەمەس، 15 ميلليوندىق جاۋ الا الماس تاس قامالعا اينالامىز. دوسىڭ كىم سەنىڭ؟