اقىندار ايتىسىنىڭ قازىرگى جاي-جاپسارى تۋرالى ايتقان رينات زايىتوۆ  ارىپتەستەرىن «سەنارييدەن شىعا الماي قالدى» دەپ ايىپتايدى. ايتىستىڭ ساپاسى السىرەپ بارا جاتقانىن مويىنداعان اقىندار ونىڭ باسقا سەبەبى بارىن ايتادى، - دەپ حابارلايدى Qamshy.kz ازاتتىققا cىلتەمە جاساپ. 

ايتىسكەر اقىن رينات زايىتوۆ «1980 جىلدارى بولماعان سەنزۋرا بۇگىنگى ايتىستا بار» دەپ الاڭدايدى.

– بۇگىنگى ايتىستا ۇيىمداستىرۋشىلاردىڭ نەمەسە بىرەۋدىڭ كوڭىلىنە جاقپايتىن ءسوز ايتساڭ، ەرتەسىندە جينالىسقا سالادى نە «كەلەسى ايتىسقا قاتىستىرمايمىز» دەپ قورقىتادى، – دەدى ول وتكەن اپتادا الماتىلىق ستۋدەنتتەرگە «بۇگىنگى ايتىس» تاقىرىبىندا وقىعان قوعامدىق لەكسياسىندا.

ايتىس ونەرىن «قاي زاماننان بەرى تاۋەلسىز، ءوز قوعامىنىڭ كەمشىلىكتەرىن، جەتىستىكتەرىن، ىندەتتەرىن ايتاتىن ورتا بولعان» دەپ سيپاتتاعان رينات زايىتوۆ قازىرگى ايتىسكەرلەردى «الدىن الا بەلگىلەنگەن سەناريي بويىنشا جىرلاپ شىعادى» دەپ ايىپتادى.

– ايتىستىڭ بۇگىنگى ەڭ باستى قاسىرەتى – اقىننىڭ جەكە ۇستامى بولماۋى، ايتىستاعى ويلاردى بىرەۋدىڭ قاداعالاپ وتىرۋى، ايتىستاعى ايتىلعان پىكىرلەرگە قارسى ساحنانىڭ سىرتىنا شىعىپ وزگە بىرەۋلەردىڭ پىكىرلەرىن ايتۋى. «ەل الىپ جاتقان كولىكتى مەن نەگە المايمىن» دەگەن ويمەن اقيقات ءۇشىن ەمەس، دۇنيە ءۇشىن ايتىساتىن اقىندار كوبەيىپ كەتتى، – دەيدى رينات زايىتوۆ.

ول «ايتىسكەرلەر ۇيىمداستىرۋشىلاردىڭ ىقپالىنان شىعا الماي، وسى بەتىمەن كەتە بەرسە، بەس جىلدان كەيىن ءۇش مىڭ ورىندىقتى سارايدا ءۇش ءجۇز ادام وتىراتىن دەڭگەيگە جەتەمىز» دەپ قاۋىپتەنەدى.