بولات ناۋكەن ۇلى ۇلتتىق ويلاۋ قابىلەتىن جوعالتپاعان قانداستارعا سۇيىنەمىن... ميللياردتان اسا جۇڭگو، ميلليونداعان ورىس، مىڭداعان مۇڭعىل سياقتى باسقا حالىقتاردىڭ ىشىندە ءجۇرىپ، تاعدىردىڭ تالكەگىنە توزگەن، اتا-اۋىل-رۋعا توپتاسۋدىڭ ارقاسىندا عانا ءتىلىن، ادەت-عۇرپىن، ءسالت-داستۇرىن، ءدىنىن ساقتاپ، اتا جۇرتقا كوشىپ كەلگەن قانداستارىمىزدى كورگەندە، مەن قازاق بولعانىما ماقتانىپ، سۇيىنەمىن. ءبىراق، ءوز ەلىندە، قالىڭ قازاقتىڭ ىشىندە، قازاق ءتىلىن بىلە تۇرا ءوزارا وزگە تىلدە سويلەسىپ، ۇلتتىق ويلاۋ قابىلەتىنەن ايىرىلعان قازاقتاردى كورگەندە، مەن قازاق بولعانىما ۇيالىپ، كۇيىنەمىن. 16 ميلليون ءبىرتۇتاس حالىقتىڭ ىشىنەن مەملەكەتتىك ءتىلدى بىلەتىن، ۇلتتىق ويلاۋ قابىلەتى جوعارى، ەلىمىزدىڭ تاريحىن، ءسالت-داستۇرىن،ادەت-عۇرپىن، مادەنيەتىن جاقسى بىلەتىن تاربيەلى-بىلىمدى مىڭ ازاماتتى، پارلامەنت پەن ۇكىمەتتە جۇمىس ىستەۋگە، ىرىكتەپ الا المايتىن ازاماتتىق قوعامىمىزدىڭ 65 پايىزى قازاقتار ەكەنىن ويلاعاندا، مەن قازاق بولعانىما ۇيالىپ، كۇيىنەمىن.