قازتالوۆ اۋدانىنداعى قاراوزەنگە جايىق-كوشىم جۇيەسىنەن باسسەينارالىق سۋدى جىبەرۋ ءۇشىن كيروۆ-شەجىن ارناسىن قايتا جاڭعىرتۋ جۇمىستارى جۇرگىزىلۋدە، دەپ حابارلايدى Qamshy.kz قازاقپارات سايتىنا سىلتەمە جاساپ.

وبلىس اكىمى التاي كولگىنوۆتىڭ ايتۋىنشا، اۋىل شارۋاشىلىعىنىڭ ءتيىمدى دامۋى يرريگاسيالىق جۇيەمەن تىكەلەي بايلانىستى. مەملەكەت باسشىسى ن.ءا.نازاربايەۆ يرريگاسيالىق جۇيەنى جاڭعىرتۋ جانە جايىلىمدىق جەرلەردى سۋلاندىرۋ ماسەلەسىنە ۇدايى كوڭىل بولۋدە. وسىعان وراي قولعا الىنعان اتالمىش جوبانىڭ ماقساتى - رەسەيدەن الىناتىن ەدىلدىڭ 30 ملن. تەكشە مەتر سۋىنا تاۋەلدىلىكتى ازايتۋ. جوبا جۇزەگە اسقاندا، وبلىستىڭ وڭتۇستىك اۋداندارىنداعى 6 مىڭ گەكتار كولتاباندارىن سۋارۋ جۇيەسى جاڭعىرتىلادى. بۇل 130 مىڭ گەكتار جەردى سۋارمالى ەتۋگە مۇمكىندىك بەرەدى. سول اۋماقتا ورنالاسقان قازتالوۆ جانە جاڭاقالا اۋداندارىنىڭ ەلدى مەكەندەرى كيروۆ-شەجىن ارناسىنىڭ تازارتقىش قوندىرعىلارى ارقىلى اۋىز سۋدى دا پايدالاناتىن بولادى.

بيىل كيروۆ-شەجىن ارناسىن جاڭعىرتۋدىڭ ءبىرىنشى كەزەڭى (55 شاقىرىم) مارەگە جەتتى. ەندى قاراشا ايىنىڭ باسىندا ەكىنشى كەزەڭى (75 شاقىرىم) اياقتالماق. جوبانى تولىق جۇزەگە اسىرۋ ءۇشىن ءۇشىنشى كەزەڭنىڭ (49 شاقىرىم، ونىڭ 18،8 شاقىرىمى - جاڭا ارنا قۇرىلىسى) جوبالىق-سمەتالىق قۇجاتتاماسى جىل سوڭىنا دەيىن دايىن بولماق. ءۇشىنشى كەزەڭ قارجىسىن الداعى جىلدىڭ بيۋدجەتىنە ەنگىزۋ باعىتىندا جۇمىستار اتقارىلۋدا. بۇعان ەل ۇكىمەتى مەن ءتيىستى مينيسترلىكتەر تاراپىنان قولداۋ كورسەتىلۋدە.

بيىل سونىمەن قاتار اقجايىق، جاڭاقالا، جانىبەك، تەرەكتى اۋداندارىنىڭ 66 سۋ شارۋاشىلىعى نىساندارىنىڭ قۇجاتتارىن جانە 3 سۋ شارۋاشىلىعى نىسانىنىڭ جوبالىق-سمەتالىق قۇجاتتاماسىن جاساۋعا 106 ملن. تەڭگە ءبولىندى. وعان قوسا سىرىم اۋدانى شولاق اڭقاتى سۋ قويماسىن قالپىنا كەلتىرۋ (5،6 ملن. تەڭگە)، ولەڭتى كولتاباندى سۋارۋ جۇيەسىن جاڭعىرتۋ (18 ملن. تەڭگە) جۇمىستارى باستالدى. تەرەكتى اۋدانى جايىق-شالقار سۋلاندىرۋ ارناسى سورعى ستانساسىنىڭ جوبالىق-سمەتالىق قۇجاتتاماسى ازىرلەندى، بۇل باعىتتاعى جۇمىستار كەلەسى جىلى قولعا الىنباق.

«وسىنىڭ ءبارى اۋىل شارۋاشىلىعى تاۋارىن وندىرۋشىلەرىنە قولايلى جاعداي جاساپ، مال شارۋاشىلىعىنىڭ ودان ءارى وركەندەۋىنە سەپتىگىن تيگىزەدى»، - دەدى التاي كولگىنوۆ.