سوتتا سۋديا ەرلان بولاتوۆ رۋسلان كۇلەكبايەۆتى ورنىنان تۇرعىزا المادى

/uploads/thumbnail/20170709123501000_small.jpg

بۇگىن الماتىداعى تەرگەۋ اباقتىسىندا رۋسلان كۇلەكبايەۆتىڭ ىسىنە قاتىستى باستى سوت وتىرىسى ءوتىپ جاتىر. قىلمىستىق ىستەر جونىندەگى مامانداندىرىلعان اۋدانارالىق سوتى سۋدياسى ەرلان بولاتوۆتىڭ ايىپتالۋشىلارعا ورنىنان تۇرىپ، جاۋاپ بەرۋ قاجەت دەگەن تالابىنا ايىپتالۋشى رۋسلان كۇلەكبايەۆ باعىنبادى، دەپ حابارلايدى سوت زالىنان قازاقپارات ءتىلشىسى.

«كۇلەكبايەۆ ورنىڭىزدان تۇرىڭىز!» دەگەن سۋديا ەرلان بولاتوۆتىڭ تالابىنا كۇلەكبايەۆ باعىنبادى. بىرنەشە رەت ايتىپ ورنىنان تۇرعىزا الماعان سۋديا اقىرى سەبەبىن سۇراۋعا ءماجبۇر بولدى.

كۇلەكبايەۆ ءىشىن كورسەتىپ: «تۇرسام، اۋىرادى!» دەپ جاۋاپ بەردى.

بۇعان سۋديا كەلىستى.

ايتا كەتەيىك، الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنا ر.كۇلەكبايەۆقا قاتىستى قىلمىستىق ءىستى اتالعان سوت سۋدياسى ەرلان بولاتوۆ جۇرگىزىپ جاتىر. كۇلەكبايەۆ بىرنەشە قانقۇيلى توناۋ جانە قاراقشىلىق ارەكەتتەرگە قاتىستى بولىپ وتىر. بۇعان دەيىن حابارلانعانداي، تەرگەۋ توبى 57 سوت ساراپتاماسى مەن زەرتتەۋلەر جۇرگىزدى جانە بولعان وقيعانىڭ بارلىق جايتتەرىن انىقتاۋ ماقساتىندا 200-دەن استام كۋاگەرلەر مەن وقيعانى كورگەن ادامداردى تەرگەدى. 2016 جىلدىڭ 12 قازانىندا 61 تومنان تۇراتىن قىلمىستىق ءىس سوتقا جولداندى. ر.كۇلەكبايەۆقا 8 قۇقىق قورعاۋ جانە ارنايى ورگان قىزمەتكەرلەرىن جانە 2 بەيبىت تۇرعىندى ءولتىردى، تەررورلىق اكت جاسادى دەگەن ايىپ تاعىلدى. سونىمەن قاتار، ول 3 بەيىبىت تۇرعىندى ولتىرمەك بولدى دەپ ايىپتالىپ وتىر.

ناقتىراق ايتقاندا، ايىپتالۋشىعا قاتىستى ق ر قىلمىستىق كودەكسىنىڭ (ق ر قك) 255-بابى 4-تارماعى (لاڭكەستىك اكت)، 99-بابى 2-تارماعى (ەكى نەمەسە ودان دا كوپ ادامدى ءولتىرۋ)، 24-بابىنىڭ 3-تارماعى (ءولتىرۋ ءۇشىن شابۋىل جاساۋ)، 192-باپ 4-تارماق (توپ ادامعا قاراقشىلىق شابۋىل)، 287-باپ 4-تارماق (زاڭسىز قارۋ تاسىمالداۋ)، 288-باپ 2-تارماق (قارۋدى زاڭسىز جاساۋ)، 291-باپ 4-تارماق (قارۋ ۇرلاۋ)، 200-باپ 4-تارماق (كولىك ۇرلاۋ)، 126-باپ 2-تارماق (ادامدى زاڭسىز باس بوستاندىعىنان ايىرۋ) بويىنشا قىلمىستىق ءىس قوزعالعان. 

سونداي-اق، ر.كۇلەكبايەۆپەن بىرگە سوتقا اتىس قارۋىن زاڭسىز ساقتاپ، وزىمەن بىرگە الىپ ءجۇرىپ، دايىنداپ، ر.كۇلەكبايەۆپەن بىرگە م. اتتى كاسىپكەردىڭ ۇيىنە قاراقشىلىق شابۋىل ۇيىمداستىرعان ر.ليۋ، ج.ساپاربەكوۆ، د.اسەمبەك ۇلى، ە.قۇسايىنوۆ، ن.ءابدىمومىن دا سوت زالىندا.

ايىپتالۋشى ن.ءابدىمومىنعا رۇقساتسىز قالادان كەتۋىنە تىيىم سالىنعان. ر.ليۋعا قاتىستى ق ر قك 188-بابىنىڭ 4-تارماعى، 288-بابىنىڭ 1-تارماعى، 287-بابىنىڭ 4-تارماعىنا قاتىستى قىلمىستىق ءىس قوزعالدى. ج. ساپاربەكوۆتىڭ ۇستىنەن ق ر قك 192-بابى 4-تارماعى؛ 287-باپ 4-تارماق بويىنشا قىلمىستىق ءىس قوزعالدى. ە. قۇسايىنوۆقا قاتىستى ق ر قك 192-بابىنىڭ 4-تارماعى بويىنشا، د. اسەمبەكۇلىنا قاتىستى ق ر قك 192-بابىنىڭ 4-تارماعى، ن. ءابدىمومىنعا قاتىستى ق ر قك 287-بابىنىڭ 4-تارماعى بويىنشا قىلمىستىق ءىس قوزعالدى.

پىكىر قالدىرۋ

قاتىستى ماقالالار