2014 جىلدىڭ 21-23 مامىرى كۇنى VII استانالىق ەكونوميكالىق فورۋمى اياسىندا ەكسپو-2017 تاقىرىبى بويىنشا ءبىرقاتار ءىس-شارالار وتەدى، دەپ مالىمدەدى «استانا ەكسپو-2017» ۇك» باسپا ءسوز حاتشىلىعى.
21 مامىر كۇنى ساعات 09.30-دان 17.00-گە دەيىن قازاق گۋمانيتارلىق-زاڭ ۋنيۆەرسيتەتىندە «ەكونوميكالىق ىقپالداستىق جانە «جاسىل تەحنولوگيالار»: جاستاردىڭ ۇلەسى» اتتى III دۇنيەجۇزىلىك ەكونوميكالىق فورۋم وتەدى. سول كۇنى ساعات 12.00-دەن 16.00-گە دەيىن استانا قالاسىندا ەكسپو-2017 حالىقارالىق مامانداندىرىلعان كورمەسىن وتكىزۋ ماسەلەلەرىنە ارنالعان ءبىرقاتار سەسسيالار وتەدى.
پىكىرتالاس بارىسىندا ەكسپو كورمەسىنىڭ ەل مەن وڭىرلەردىڭ يندۋستريالدى-يننوۆاسيالىق دامۋىنا جانە مەملەكەت ەكونوميكاسىنىڭ دامۋىنا، كورمەنى وتكىزگەنگە دەيىن جانە كەيىن تۋىندايتىن بيزنەس پەن ينۆەستيسيالار ءۇشىن جاڭا مۇمكىندىكتەرگە، سونىمەن قاتار وڭىرلەردىڭ ينفراقۇرىلىمىنىڭ دامۋىنا ۇلەسى تالقىلانادى.
ەكسپو-2017 سەسسياسىنا شاقىرىلعان قوناقتاردىڭ ىشىندە الەمدىك كوشباسشىلار مەن ساياساتكەرلەر، جەتەكشى ساراپشىلار جانە ەنەرگەتيكالىق سالا عالىمدارى. سپيكەرلەر رەتىندە حالىقارالىق كورمەلەر بيۋروسىنىڭ (حكب) باس حاتشىسىنىڭ كەڭەسشىلەرى يۆان پروستاكوۆ پەن انكا كورينا انحەل (Anca Corina Anghel)؛ 2006 جىلعى فيزيكادان نوبەل لاۋرەاتى دجوردج فيسدجەرالد سمۋت ءۇشىنشى (George Fitzgerald Smoot III)؛ ەكسپو-2008 ساراگوسا كوميسسار كەڭسەنىڭ باس ديرەكتورى ەدۋاردو لوپەس بۋسكەتس (Eduardo López Busquets)؛ «بارلىعىنا ارنالعان تۇراقتى ەنەرگەتيكا» باستاماسى ءۇشىن بۇۇ قورىنىڭ ارنايى كەڭەسشىسى سەرج مارتين (Serge Martin)؛ AES جانە EPTISA Engineering كومپانيالارىنىڭ وكىلدەرى بايانداما جاسايدى. قازاقستاندىق تاراپتى ەكسپو-2017 حالىقارالىق مامانداندىرىلعان كورمە كوميسسارى، قازاقستان رەسپۋبليكاسىنىڭ سىرتقى ىستەر مينيسترلىگىنىڭ ءبىرىنشى ورىنباسارى ءراپىل جوشىبايەۆ؛ «استانا ەكسپو-2017» ۇك» اق باسقارماسىنىڭ ءتوراعاسى تالعات ەرمەگيايەۆ؛ ق ر پارلامەنتىنىڭ ءماجىلىس دەپۋتاتى ايگۇل سولوۆيەۆا؛ ««جاسىل» ەكونوميكا جانە G-Global دامۋى ءۇشىن» كواليسيا باسقارماسىنىڭ ءتوراعاسى سالتانات راحيمبەكوۆا جانە باسقالارى ۇسىنادى.
«استانا ەكسپو-2017» ۇك» اق باسقارماسىنىڭ ءتوراعاسى، تالعات ەرمەگيايەۆءتىڭ ايتۋى بويىنشا استانالىق ەكونوميكالىق فورۋم ۇسىناتىن پىكىرتالاس الاڭىنىڭ دەڭگەيى وتە جوعارى. «وسى سەسسيالاردىڭ ناتيجەلەرى بويىنشا ءبىز ساراپشىلار مەن بيزنەس وكىلدەردىڭ پىكىرىن ەستيتىنىمىزگە سەنىمدىمىز جانە وسىنىڭ بارلىعىن استانا ق. ەكسپو-2017 حالىقارالىق مامانداندىرىلعان كورمەسىن دايىنداۋ كەزىندە ەسكەرەمىز».
بۇدان باسقا، VII استانالىق ەكونوميكالىق فورۋمنىڭ اياسىندا «استانالىق ەكونوميكالىق عالىمدار كلۋبى» قاۋىمداستىعى، ««جاسىل» ەكونوميكا جانە G-Global دامۋى ءۇشىن» كواليسياسى جانە «استانا ەكسپو-2017» ۇلتتىق كومپانياسى اراسىندا مەموراندۋمعا قول قويىلعان. تاراپتار استاناداعى ەكسپو-2017 حالىقارالىق مامانداندىرىلعان كورمەسىن دايىنداۋعا ءوز كۇشتەرىن بىرىكتىرۋگە كەلىستى.
پىكىر قالدىرۋ