قىتايدىڭ ىشكى موڭعوليا ايماعىندا جەرگىلىكتى شارۋالار جەرلەرىن قورعاپ، ەرەۋىلگە شىعۋدا، - دەپ حابارلايدى Qamshy.kz.

بۇل تۋرالى ىشكى موڭعوليا ادام قۇقىقتارى جونىندەگى اقپاراتتىق ورتالىعى حابارلادى.

قازاننىڭ 17-نەن بەرى نارازىلىق ءبىلدىرىپ جاتقان مالشىلار قىتايلىق COFCO Group ۇلتتىق كورپوراسياسىنىڭ وسىعان دەيىن شارۋالار پايدالانىپ كەلگەن جايىلىم جەرلەرىنە شوشقا فەرماسىن سالۋىنا قارسىلىق بىلدىرۋدە. شارۋالار ءبىراۋىزدان قىتايلىق كاسىپورىن جايىلىم جەردى زاڭسىز يەلەنىپ كەتپەك دەپ وتىر.

ىشكى موڭعوليانىڭ شىعىسىندا ورنالاسقان ونگيۋد حوشۋۋ، حايلااس قالاشىقتارىنان جانە سانداگ گاساا ەلدى مەكەندەرىنەن كەلگەن جۇزدەن استام شارۋا كومپانيانىڭ قۇرىلىس الاڭىنا جينالعان.

ەرەۋىلشىلەر قولدارىنا «بۇل ءبىزدىڭ جەرىمىز! اتا-بابالارىمىزدان قالعان جەرلەر كەلەر ۇرپاققا دا قالۋى كەرەك!»، «ءبىز، موڭعولدار، بىرىكسەك – مىقتىمىز!» دەگەن ۇراندار ۇستاعان.

اقپارات ورتالىعى تاراتقان حابارلامادا ەرەۋىلشىلەر «جەرىمىزدى قۇدايدىڭ ءوزى سۇراسا دا بەرمەيمىز!» دەگەن تالاپ قويىپ جاتقانى ايتىلادى. ورتالىق بۇل ءسوزدىڭ تاريحي ۇران ەكەنىن، كەزىندە جوڭعار يمپەرياسىن مانچجۋر شاپقىنشىلىعىنان قورعاعان موڭعولداردىڭ ۇلتتىق باتىرى گالدان بوشيگت ۇران ەتكەنىن ەسكە سالۋدا.

شارۋالار سونداي-اق، قىتايلىق كومپانيانىڭ بۇل باستاماسى تەك مالشىلاردى اتا قونىسىنان ايىرىپ قانا قويماي، قورشاعان ورتاعا دا زيانىن تيگىزەتىنىنە الاڭداۋلى.

نەگىزگى نىساندارى شاندۋن پروۆينيسياسىندا ورنالاسقان COFCO كومپانياسى تاعام ونىمدەرىن شىعارۋمەن اينالىسادى جانە اتالعان ايماقتا بىرنەشە ميلليون شوشقا وسىرۋگە مۇمكىندىك بەرەتىن الىپ فەرمانىڭ قۇرىلىسىن باستاپ تا كەتكەن.

اقپارات ورتالىعى ەرەۋىلشىلەرگە قارسى پوليسيا جاساعى مەن ارنايى تەحنيكا قولدانىلعانى، بىرنەشە شارۋانىڭ سوققىعا جىعىلعانىن دا حابارلادى.