مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ ورىنباسارى الىك شپەكبايەۆ ەلىمىزدىڭ الەمدىك جەمقورلىق رەيتينگىندە 2014 – 2016 جىلدار اراسىندا 17 ورىنعا كوتەرىلگەنى تۋرالى باياندادى، دەپ حابارلايدى «قامشى» پورتالى Today.kz-كە سىلتەمە جاساپ. ول، بۇلاي دەپ الماتىدا جەمقورلىققا قارسى كۇرەس جونىندەگى وتىرىس بارىسىندا ايتقان.
«جەمقورلىق تاقىرىبى تەك مەملەكەتتى عانا ەمەس، قوعامدى دا الاڭداتادى، بۇل پروبلەما بارلىق ەلدەردە بار. ءبىزدىڭ ەلدە جەمقورلىق دەڭگەيى تىم بيىك بولعاندىقتان، ءبىز الەم بويىنشا 123 ورىندى يەلەنىپ وتىرمىز. الايدا، جۇرگىزىلىپ جاتقان جەمقورلىقپەن كۇرەس ساياساتى ارقاسىندا 2014 – 2016 جىلداردا ءبىز 17 ورىنعا كوتەرىلدىك. زاڭ بۇزۋشىلىق اكىمشىلىكتەردە دە بار. جەمقورلىققا قاتىستى بەس مىڭ وقيعا انىقتالدى، ونىڭ 10 پايىزى – اسا اۋىر قىلمىستار. بۇگىنگى تاڭدا جەمقورلىقتى ازايتۋعا باعىتتالعان 59 زاڭ قولدانىستا. 2016 جىلدىڭ توعىز ايى ىشىندە الماتىدا جەمقورلىق ارەكەتتەرى ءۇشىن 871 لاۋازىم يەسى جاۋاپقا تارتىلدى. جەمقورلىقتىڭ ەڭ تومەنگى دەڭگەيى سولتۇستىك قازاقستان وبلىسىندا. الماتى اكىمشىلىگى قۇرامىنداعى جەمقورلىق جايلاعان باعىت – تۇرعىن ءۇي قۇرىلىس»، - دەگەن شپەكبايەۆ مالىمدەمەسىندە.
سونداي-اق وتىرىس بارىسىندا الماتى اكىمى باۋىرجان بايبەك قالادا جەمقورلىقپەن كۇرەس جۇمىستارىنىڭ بەلسەندى ءجۇرىپ جاتقانىن مالىمدەدى. ول الماتى كوشەلەرىندە 700 بەينەكامەرانىڭ ورناتىلىپ، جۇيەنىڭ تيىمدىلىگىن ارتتىرۋ ءۇشىن قوسىمشا جابدىق الۋ قاجەتتىگىن ايتتى. قالا بويىنشا 4 ميلليارد تەڭگە كولەمىندە ايىپپۇل جينالعان.
