كەي ادامدار «عىلىم-تەحنيكا ۇشقان قۇستاي دامىعان بۇل زاماندا»- دەپ ءسوز باستايدى. شىن مانىندە عىلىم-تەحنيكا دامىعان جوق، بارىنشا جىلدامدىقپەن دامىتۋ جانە سول ارقىلى ءوزىن كەمەلدەندىرۋگە بارىن سالىپ قۇلشىنۋدا. تومەندەگى ءبىرقانشا جەتىستىكتەر دامۋ ءۇشىن ىزدەنىستىڭ ايقىن دالەلى.

ءبىرىنشى، وزدىگىنەن ۇيرەنىپ، ويلانا الاتىن روبوت؛

قورشاما دويبىدا الەم بويىنشا ءبىرىنشى ورىندا تۇراتىن لي شىشىنىڭ AlphaGo اتتى روبوتتان 1 دە 4 ۇپايمەن جەڭىلىپ قالۋى...

ەكىنشى، جاساندى زەيىن-زەردەلى اۆتوكولىك؛

بۇل تۇردەگى كولىكتەر ءىرى قالالاردا ىسكە قوسىلدى. جولدا وزدىگىنەن جۇرەدى. كولىك اپاتىنان ساقتايدى ءارى الدىن الادى. ءتىپتى بولاشاقتا وزدىگىنەن زاريادتالىپ، جانار مايىن تولىقتاپ وتىرادى.

ءۇشىنشى، روبوت جۋرناليست؛

كورەيانىڭ ءبىر ەكونوميكا اقپاراتىندا، قۇندى قاعازدار باعاسىنىڭ وزگەرىسىنە ساي، 0،1 سەكۋندتىق ايىرماشىلىقپەن اقپارات جازىپ جاريالايتىن جۋرناليست روبوتتار جۇمىس ىستەۋدە دەپ جازدى.

ءتورتىنشى، روبوت وقىتۋشى؛

اقش-تىڭ ءبىر ۋنيۆەرسيتەتىندە روبوت وقىتۋشى 6 اي بويى ستۋدەنتتەرگە ساباق بەرگەن. الايدا، ونىڭ روبوت ەكەنىن بىردە ءبىر ستۋدەنت بايقاماعان.

بەسىنشى، كومەكشى روبوت؛

بۇرىندارى تەك ەرەكشە جاعدايدا عانا جۇمىس ىستەيتىن روبوتتار ءقازىر ءتىپتى دە كەمەلدەنىپ ءارى كولەمى كىشىرەيىپ، ءاربىر ادامنىڭ جەكە كومەكشىسى رەتىندە جەكە وتباسىنا جالپى قولدانىسقا تۇسۋدە. Google كومپانياسىنىڭ Assistant قوبديشاسى مەن Amazon كومپانياسىنىڭ Echo قوبديشالارى وسىنىڭ دالەلى.

التىنشى، جىنىستىق قىزمەت وتەيتىن روبوتتار

بۇل تۇردەگى روبوتتاردىڭ العاشقى جوبالارى جاسالعان، وعان عالىمدار جاساندى ادام تەرىسى، سەزىم جانە تۇيسىك ءبىتىرۋ ءۇشىن قۇلشىنىپ جاتقان كورىنەدى.

وسىلارعا قاراعاندا عىلىم-بىلىممەن شىنايى قارۋلانعان وزگە ەلدىڭ بالاسى جەردە جاتقان قۋ تەمىرگە جان ءبىتىرىپ، وعان ءتىل مەن جازۋ ۇيرەتىپ، ءتىپتى دە جوعارى جۇمىس ونىمدىلىكتەرى  مەن جاراتقاننىڭ زەيىنىن الەمنىڭ باسقادا ءتىلسىم قۇبىلىستارىن زەرتتەۋگە، بىلۋگە قۇلشىنىپ جاتىر. جوعارىداعى جازىلعاندار تەك ءبىر سالاداعى ءمالىم بىرنەشە جەتىستىكتەر عانا، ال قانشاما باسقادا سالالار مەن تاقىرىپتار بار.

ءبىز شە؟؟! باسقاسىن ايتپاعاندا، وسەر ەلدىڭ بالاسى ينتەرنەتتەن پايدالانىپ، اقىلى مەن ءبىلىمىن باسەكەلەستىرىپ، ومىرشەڭدىك اسقاق رۋح ءۇشىن جانىن سالىپ ىزدەنىپ جاتىر. ال ءبىز، باسىم كوپشىلىگىمىز، ينتەرنەتتى جەرشىلدىك، رۋشىلدىقتىڭ تاۋسىلماس داۋىنان دامىپ، وسەكتىڭ كوبەيگەنى سونشالىق، جەرىمىز نيەتىمىزدەن بەتەر تارىلىپ بارادى. قاراپ وتىرساڭ، ءبىر اتانىڭ شوبەرەلەرى مارقۇم بوپ كەتكەن اكەلەرىن قۇر ماقتاۋدان اسا الماي، اتا رۋحىن، ۇرپاق ءۇمىتىن جەر قىلۋعا ىعىسىپ بارادى. ەگەردە ءدال وسى سۇرەڭمەن جۇرە بەرسەك، دامىعان ەلدىڭ بالاسى تۇگىلى، قۋ تەمىردەن وزگەرگەن روبوتقا دا جارامسىز بولىپ قالامىز-اۋ. ءبىراق ونىڭ بەتىن ارى قىلسىن!

ەندەشە، ءبىلىم ۇيرەنەيىك. عىلىم – شەن الۋ، ابىروي ءۇشىن ەمەس! اتادان قالعان ءداستۇر مەن مۇرالاردى تىزىمدىككە ەنگىزىپ قورعاۋدىڭ ورنىنا، ءعىلىم-بىلىم ارقىلى اتانىڭ اسىل مۇراسىن، اجەنىڭ اسىل اقىلىن، تاۋسىلماس پاراساتىن الەمدىك دەڭگەيگە كوتەرۋ ءۇشىن، جاڭالىق جاراتۋ ءۇشىن ۇيرەنەيىك. زەرتتەيىك، جاراتىلىستىڭ تىلسىمىن ءعىلىم-بىلىم ارقىلى تانۋعا كۇش سالايىق.

قامشىگەر: ينتەرنەت تانۋشى، ويلان

http://suhbat.kazakhsoft.com/