قىتايدا ەسىرتكى تاسىمالدادى دەپ ايىپتالىپ، ءومىر بويى باس بوستاندىعىنان ايىرىلعان قازاقستان ازاماتى اقجارقىن تۇرلىبايعا قاتىستى ءبىرىنشى ساتىداعى سوتتىڭ جاڭا وتىرىسى باستالدى. سوت وتانداسىمىز ۇستالعان گۋاندۋن پروۆينسياسى، گۋانچجوۋ قالاسىندا ءوتىپ جاتىر، - دەپ حابارلايدى 24.kz.
سوت وتىرىسىنا ءۇش سوت، ەكى ايىپتاۋشى جانە ا. تۇرلىبايدىڭ قىتايداعى ەكى قورعاۋشىسى مەن قازاقستانداعى ادۆوكاتى سۇڭقار نۇرماعامبەتوۆ قاتىسۋدا. سونىمەن قاتار ق ر كونسۋلدىق ءبولىمنىڭ باسشىسى بولات سىرلىبايەۆ تا بار. سوتتا اۋدارماشى بولعانىمەن سۇراقتارعا اقجارقىننىڭ ءوزى قىتايشا جاۋاپ بەرۋدە.
بۇعان دەيىنگى وتىرىستاردىڭ بارلىعىنا قاتىسقان اقجارقىننىڭ اناسى بۇل جولى كەلە المادى. ەستەرىڭىزدە بولسا، 21 جاستاعى اقجارقىن تۇرلىباي 2014 جىلدىڭ ناۋرىز ايىندا قىتايدىڭ مالايزيامەن شەكاراسىندا ەسىرتكىمەن ۇستالدى. وسى ءىس بويىنشا گۋانچجوۋ سوتى اقجارقىن تۇرلىبايدى ەسىرتكى زاتتارىن تاسىمالدادى دەپ ايىپتاپ، ءومىر بويى باس بوستاندىعىنان ايىردى. كەيىن زاڭسىز ەسىرتكى اينالىمىمەن كۇرەس جونىندەگى ورتاازيالىق ايماقتىق اقپاراتتىق ورتالىق جەرلەسىمىزدى نيگەريالىق ناركومافيانىڭ قۇربانى بولدى دەپ مالىمدەگەن ەدى. بيىل 7 ساۋىردە اپەللياسيالىق ساتىداعى سوت اقجارقىن تۇرلىبايدى ءومىر بويى باس بوستاندىعىنان ايىرۋ جازاسىن وزگەرتۋ جانە ءىستى ءبىرىنشى ساتىداعى سوتتىڭ قاراۋىنا جىبەرۋ تۋرالى شەشىم شىعاردى.
