قازاقستاندىقتاردىڭ عالامتورعا تالقىلاۋعا شىعارىلعان زاڭ جوبالارى مەن وزگە دە نورماتيۆتىك-قۇقىقتىق اكتىلەرگە پىكىر ءبىلدىرۋى تومەن. بۇل تۋرالى بۇگىن ق ر پارلامەنتى ءماجىلىسى حالىقارالىق ىستەر، قورعانىس جانە قاۋىپسىزدىك كوميتەتىنىڭ كوشپەلى وتىرىسىندا ەلىمىزدىڭ اقپارات جانە كوممۋنيكاسيالار ءمينيسترى داۋرەن ابايەۆ ءمالىم ەتتى، - دەپ حابارلايدى قازاقپارات.

«مينيسترلىك «اشىق ۇكىمەت» ينتەرنەت-پورتالىن تەحنيكالىق قامتاماسىز ەتۋ  جانە جۇمىسىن جولعا قويۋ باعىتىندا كەڭ اۋقىمدى ىستەر اتقارۋدا. بۇگىنگى كۇنى «اشىق نورماتيۆتىك-قۇقىقتىق اكتىلەر» پورتالىندا ورنالاستىرعان نورماتيۆتىك-قۇقىقتىق اكتىلەر، ونىڭ ىشىندە زاڭ جوبالارى مەن مەملەكەتتىك قىزمەتتەر ستاندارتتارى سانى 4 مىڭنان اسادى. ولارعا 120-دان استام پىكىر تۇسكەن»، - دەدى ول.

وسى رەتتە مينيستر 4،5 مىڭ جوباعا نەبارى 120 عانا كومەنتارييدىڭ بولۋى ازدىق ەتەتىندىگىن باسا ايتتى. «ءتىپتى، ءقازىر ءبىز ۇسىنىپ وتىرعان اقپارات جانە كوممۋنيكاسيالار ماسەلەلەرى بويىنشا زاڭ جوباسىنا دا جۋرناليستەر اراسىندا دۇرلىگۋ بولعانىمەن نەبارى 9 عانا پىكىر قالدىرىلعان. بۇل رەتتە ءبىز قاراستىرىپ، انىقتايتىن بولامىز. مۇمكىن پروسەدۋرا قيىنداۋ شىعار»،  - دەدى مينيستر.

ول پىكىرلەردىڭ از بولۋىن حالىق اراسىندا ءتۇسىندىرۋ جۇمىستارىنىڭ جەتكىلىكسىز  بولۋىمەن بايلانىستىراتىندىقتارىن اشىق ايتتى.

سونىمەن قاتار  بۇل كەمشىلىكتى مويىندايتىندىعىن، ونى جويۋ شارالارى قولعا الىناتىندىعىن اتاپ ءوتتى.

سونداي-اق ابايەۆتىڭ ايتۋىنشا، اعىمداعى جىلدىڭ 9 ايىنىڭ قورىتىندىسىندا بيۋدجەتتىك باعدارلامالاردىڭ اكىمشىلەرى «اشىق بيۋدجەت» پورتالىنا 3867 بيۋدجەتتىك باعدارلامالار جوباسىن ورنالاستىرعان. ونىڭ ىشىندە بۇگىنگى كۇنى 365 جوبا جاريا تالقىلانۋدا. مۇنان بولەك، اتالعان پورتالدا بيۋدجەتتىك، شوعىرلاندىرىلعان جانە قارجىلىق ەسەپتى قامتيتىن 1666 ەسەپ-قيساپ جاريا ەتىلگەن.