بۇگىن الماتىدا 28-بۇكىلالەمدىك قىسقى ۋنيۆەرسياداعا 100 كۇن قالۋىنا وراي مەرەكەلىك شارا وتەدى. الماتى قالاسىنداعى جوو-نىڭ 1000-نان استام ستۋدەنتتەرى ۋنيۆەرسيادانىڭ باستى مۋزىكالىق تاقىرىبىمەن تانىسۋ ءۇشىن ب.شولاق اتىنداعى مادەنيەت جانە سپورت سارايىنىڭ الدىنا جينالدى. شارا كەزىندە الماتى قالاسىنىڭ اكىمى باۋىرجان بايبەك تانىمال مادەنيەت قايراتكەرلەرىنە ۋنيۆەرسيادا ەلشىلەرىنىڭ ديپلومىن تابىستادى.  الماتىدا وتەتىن ۋنيۆەرسياداعا 100 كۇن قالۋىنا وراي قىسقى ويىنداردىڭ باستى مۋزىكالىق تاقىرىبى تانىستىرىلدى كومپوزيسيانىڭ اۆتورى تانىمال قازاقستاندىق سازگەر – يسلام راقىمجانوۆ. «زولوتوي گرامموفون» پرەمياسىنىڭ ءۇش دۇركىن جانە ەكى مارتە «جىل ءانى» تەليەۆيزيالىق بايقاۋىنىڭ لاۋرەاتى اتاندى. ۋنيۆەرسيادانىڭ باستالۋىنا 100 كۇن قالعانىنا وراي وتكىزىلگەن مەرەكەلىك شارادا اتالعان مۋزىكالالىق كومپوزيسيانى العاش رەت حالىق الدىندا قازاقستاندىق انشىلەر نۇرلان ابدۋللين، لورەن جانە دە ءان اۆتورى بىرگە ورىندادى. قازاقتىڭ ۇلتتىق اسپاپتارى – قوبىز، دومبىرا، قىل قوبىز، ساز سىرناي جانە شاڭقوبىزدا «The Magic of Nomads» اتتى تانىمال تۋىندىنى عازيزا عابدراحيموۆا مەن جالعابەك ىلەس ورىندادى. ۋنيۆەرسياداعا 100 كۇن قالۋىن مەرەكەلەۋ كەزىندە الماتى قالاسىنىڭ اكىمى باۋىرجان بايبەك قازاقستاندىق ەسترادا جۇلدىزدارىنا 2017 جىلعى ۋنيۆەرسسيادا ەلشىسى ديپلومىن تابىستادى.

حالىقارالىق ستۋدەنتتەر ويىندارىنىڭ رەسمي وكىلدەرى بولىپ ق ر ەڭبەك سىڭىرگەن مادەنيەت قايراتكەرى ءقىدىرالى بولمانوۆ، II حالىقارالىق Turkvision تەليەۆيزيالىق ءان كونكۋرسىنىڭ جەڭىمپازى جانار دوعالوۆا، تانىمال قازاقستاندىق ەسترادا ءانشىسى، ءبيشى، كومپوزيتور ءالي وقاپوۆ، «نوۆايا ۆولنا-2009» لاۋرەاتى نۇرجان كەرمەنبايەۆ تاعايىندالدى.

«ەگەمەن قازاقستان» گازەتى