تەاتر قايراتكەرى، قازاقستاننىڭ حالىق ءارتىسى تۇڭعىشباي جامانقۇلوۆتىڭ قازىنا قاراجاتىن جىمقىردى دەگەن ايىپپەن قاماۋعا الىنۋى قوعامدا قىزۋ تالقىعا ءتۇستى. Qamshy.kz ت. جامانقۇلوۆقا دەيىن دە ءتۇرلى ايىپتارمەن قاماۋعا الىنىپ، سوتتى بولعان قازاقستاندىق زيالى قاۋىم وكىلدەرىنىڭ ءبىرقاتارىن وقىرمان نازارىنا ۇسىنۋدى ءجون كوردى.

ارون اتابەك، اقىن، پۋبليسيست. الماتى قالاسى «شاڭىراق» ىقشام اۋدانىندا 2006 جىلى وتكەن نارازىلىق شارالارى كەزىندە جاپپاي تارتىپسىزدىكتەر ۇيىمداستىردى، پوليسيانى تۇتقىنعا الىپ، ءولتىردى دەگەن ايىپپەن 2008 جىلى 5 قازاندا 18 جىلعا باس بوستاندىعىنان ايرىلدى. جازا مەرزىمىن سوت 2006 جىلدىڭ 17 شىلدەسىنەن باستاپ ەسەپتەۋدى بەلگىلەدى. ا. اتابەكتىڭ جازا مەرزىمى 2024 جىلى 16 شىلدەدە اياقتالادى.

جاقسىلىق دوسقالييەۆ، مەديسينا عىلىمدارىنىڭ دوكتورى، پروفەسسور. 2010 جىلى ج. دوسقالييەۆتىڭ ۇستىنەن دەنساۋلىق ساقتاۋ ءمينيسترى قىزمەتىن اتقارۋ كەزىندە لاۋازىمدىق مىندەتتەرىن اسىرا پايدالاندى دەگەن ايىپپەن قىلمىستىق ءىس قوزعالىپ، سوت شەشىمىمەن 2011 جىلدىڭ 5 تامىزىندا 7 جىلعا باس بوستاندىعىنان ايرىلدى. 2012 جىلى پرەزيدەنت جارلىعىمەن كەشىرىم بەرىلىپ، بوستاندىققا شىقتى.

سەرىك ساپارعالي، جازۋشى. 2012 جىلى سوت ۇكىمىمەن «قازاقستان رەسپۋبليكاسىنىڭ كونستيتۋسيالىق قۇرىلىمىن كۇشتەپ قۇلاتۋعا نەمەسە وزگەرتۋگە نە ونىڭ اۋماقتىق تۇتاستىعىن كۇشپەن بۇزۋعا شاقىرۋ» بابى بويىنشا كىنالى دەپ تانىلىپ، 4 جىلعا شارتتى تۇردە باس بوستاندىعىنان ايرىلدى.

سايات ىبىراي، عالىم، تەحنيكا عىلىمدارىنىڭ دوكتورى، پروفەسسور. 2012 جىلى «ءدىني ارازدىق تۋعىزدى»، «ەكسترەميزم»، «قىلمىستىق توپ قۇردى» دەگەن ايىپتارمەن 12 جىلعا باس بوستاندىعىنان ايرىلدى.

ەرلان ارىن، عالىم، ەكونوميكا عىلىمدارىنىڭ دوكتورى، پروفەسسور. 2014 جىلى پاۆلودار وبلىسىنىڭ اكىمى لاۋازىمىن اتقارۋ كەزىندە لاۋازىمدىق مىندەتتەرىن اسىرا پايدالاندى دەپ ايىپتالىپ، سوت ۇكىمىمەن 3 جىلعا شارتتى تۇردە باس بوستاندىعىنان ايرىلدى. سونداي-اق، سوت ونى «قۇرمەت»، «پاراسات» وردەندەرىنەن ايىردى.

سەيىتقازى ماتايەۆ، جۋرناليست، قازاقستان جۋرناليستەر وداعىنىڭ ءتوراعاسى. جەمقورلىققا قارسى ءىس-قيمىل جونىندەگى ۇلتتىق بيۋرو اكەلى-بالالى سەيىتقازى جانە اسەت ماتايەۆتاردىڭ ۇستىنەن جەمقورلىق فاكتىلەرى بويىنشا قىلمىستىق ءىس قوزعادى. 2016 جىلى 3 قازاندا استانا قالالىق ەسىل اۋدانىنىڭ 2№ سوتى س. ماتايەۆتى سالىق تولەۋدەن جالتاردى، الاياقتىق جاسادى دەپ تاۋىپ، 6 جىلعا باس بوستاندىعىنان ايرىلدى. ال، س. ماتايەۆتىڭ ۇلى «قازتاگ» حالىقارالىق اقپارات اگەنتتىگىنىڭ باسشىسى اسەت ماتايەۆتى «الاياقتىق» بابى بويىنشا 6 جىلعا باس بوستاندىعىنان ايىردى.