استانادا ەۋرازيا وداعىنا قارسى ءىس-شارا وتكىزبەك بولعان ون ادام "ۇساق بۇزاقىلىق" جاسادى دەگەن ايىپپەن ءۇش كۇننەن ءتورت كۇنگە دەيىنگى مەرزىمدەرگە اكىمشىلىك قاماۋعا الىندى. قامالعانداردىڭ اراسىندا ءىس-شارادان حابار دايىنداۋعا بارعان ازاتتىق ءتىلشىسى وركەن جويامەرگەن دە بار.

ازاتتىق ءتىلشىسىنىڭ حابارلاۋىنشا، "16/12" ينتەرنەت پورتالىنىڭ جۋرناليستەرى سانات ۋرنالييەۆ پەن ۆيكتور گۋدز دە اكىمشىلىك قاماۋعا الىنعان.

ەسىل اۋداندىق ىشكى ىستەر باسقارماسىنىڭ استانا قالاسى اۋدانارالىق مامانداندىرىلعان اكىمشىلىك سوتىنا جىبەرگەن راپورتىندا وركەن جويامەرگەننىڭ قازاقستان اكىمشىلىك قۇقىق بۇزۋشىلىق كودەكسىندە قاراستىرىلعان "ۇساق بۇزاقىلىق جاساعانى" ايتىلعان.

استانا قالاسىنداعى اكىمشىلىك قاماۋعا الىنعاندار ۇستالاتىن اباقتىنىڭ كەزەكشى ءبولىمى جۋرناليست وركەن جويامەرگەننىڭ ءتورت تاۋلىككە قامالعانىن ازاتتىققا راستادى.

27 مامىر كۇنى استانادا "انتيگەپتيل" قوزعالىسى مەن ءبىرقاتار قالا تۇرعىندارى، جيىنى 20 شاقتى ادام قالا شەتىندەگى يلينكا كەنتىندە "انتيەۋرازيالىق جيىن" وتكىزىپ، 29 مامىر - ەۋرازيا وداعى تۋرالى كەلىسىمگە قول قويىلاتىن كۇنگى ءىس-شارالارىن جوسپارلاماق بولعان. بەلسەندىلەر وندا ءىس-شارالار وتكىزۋ ءۇشىن كيىز ءۇيدى جالعا الىپ، جۋرناليستەردى دە شاقىرعان. ولاردىڭ ىزىنشە بارعان پوليسيا جينالعانداردىڭ بارلىعىن ۇستاپ اكەتكەن.
 
پوليسيا "انتيەۋرازيالىق" جيىن وتەتىن جەرگە جاقىن تۇراتىن استانانىڭ جەتى تۇرعىنىنان ارىز تۇسكەنىن، وندا بەلسەندىلەر "تۇرعىندارعا دورەكى سويلەپ"، ءتىپتى كەيبىرىنە "قول جۇمساعانى" جازىلعانىن ايتادى.

قامالعان جۋرناليستەر مەن بەلسەندىلەر وزدەرىنە تاعىلعان ايىپتى مويىنداماي، ولارعا قارسى جازىلعان شاعىمدى "ەۋرازيا وداعىنا قول قويىلاتىن كۇن قارساڭىنداعى ارانداتۋشىلىق" دەپ اتايدى.

29 مامىر كۇنى استانادا رەسەي، قازاقستان مەن بەلارۋس پرەزيدەنتتەرى ەۋرازيا ەكونوميكالىق وداعىن قۇرۋ تۋرالى كەلىسىمگە قول قويادى دەپ حابارلاندى. بۇل كۇن تاياعان سايىن الماتى مەن استانادا قازاقستاننىڭ جاڭا ءبىر ايماقتىق وداققا كىرۋىنە قارسى ازاماتتىق اكسيالار ءجيى وتە باستادى.

http://www.azattyq.org