مادەنيەت جانە سپورت ءمينيسترى ارىستانبەك مۇحامەدي ۇلى قانات يسلامنىڭ جەڭىستەرى ءۇشىن العىسىن بىلدىرە وتىرىپ، ۇلتتىق بورىك پەن شاپان جاپتى. قانات يسلامنىڭ جەڭىسىنە ارنالعان كەزدەسۋ  مادەنيەت مينيسترلىگىندە ءوتتى، - دەپ حابارلايدى Qamshy.kz قازاقپارات سايتىنا سىلتەمە جاساپ.

استانادا ەكسپو كورمەسى وتكىزىلگەن كەزدە قانات يسلامنىڭ بوكس كەشى وتكىزىلۋى مۇمكىن. بۇل تۋرالى بۇگىن قانات يسلاممەن كەزدەسۋ وتكىزگەن ق ر مادەنيەت جانە سپورت ءمينيسترى ارىستانبەك مۇحامەدي ۇلى ءمالىم ەتتى. «قانات يسلاممەن سول ءۇشىن كەزدەسىپ جاتىرمىز. ونداي جوسپارلارىمىز بار. ءقازىر ونى الدىن الا ايتۋعا ءالى ەرتە. بۇگىنگى كەزدەسۋىمىزدىڭ ءبىر ماقساتى - كەزدەسىپ، راحمەتىمىزدى ايتۋ، ەكىنشىدەن - وسى الداعى قويعان جوسپارلاردى بىرىگىپ، ىسكە اسىرۋ»، - دەدى مينيستر كەزدەسۋدەن سوڭ تىلشىلەرگە بەرگەن سۇحباتىندا.
ا.مۇحامەدي ۇلى سونىمەن قاتار گەنناديي گولوۆكينمەن دە كەلىسسوزدەر جۇرگىزىلىپ جاتقاندىعىن اتاپ ءوتتى. «ونى دا ايتۋعا ءالى قيىن. ءبىراق كەلىسسوزدەر جۇرگىزىپ جاتىرمىز. بىزدە ەكسپو ءۇش اي بولادى. ول ءۇش ايدىڭ ىشىندە ءار سايىن ءوتىپ جاتسا دا، ونىڭ ارتىقشىلىعى جوق. بىزگە وسىنداي ۇلكەن شارالاردى وتكىزىپ، تۋريستەردىڭ كوبىرەك كەلگەنى جاقسى»، - دەپ ءتۇيدى ويىن ا.مۇحامەدي ۇلى.