ەۋرازيالىق وداققا قارسىلىق تانىتقان ءدۇيىم جۇرتتى كىنالاپ جاتقان ءبىر توپ اعايىن بار. "قارا اسپاندى قاپىلتتى، اقىرزامان ورناتتى، كۇڭىرەنەتىندەي نە بولدى سونشا، وتىرىك جىلاپ-سىقتاپ جاتىر" قويشى ايتەۋىر قاراپايىم حالىققا ايتىلماعان سىن، تاعىلماعان ءمىن قالمادى. ال پرەزيدەنتتىڭ وسى شەشىمىن اقتاپ الۋعا كەلگەندە، الدارىنا جان سالمايدى. جارايدى دەلىك، بىرەۋى پسيەۆدوپاتريوت شىعار، ەكىنشىسى وتىرىكۇلتشىل دەلىك، ءبىراق، تۋعان وتانىنىڭ بولاشاعىنا شىن الاڭداعان كوپكە توپىراق شاشۋعا بولا ما؟ الدە الاڭداۋعا نەگىز جوق پا؟ ءوز باۋىرىنىڭ جەرىنە قول سالىپ، ۋكراينا حالقىنىڭ كوز-جاسىنا قالعان رەسەي بىزگە ءقاۋىپتى ەمەس دەپ كىم ايتا الادى؟ دوس ەكەندىگىنە كىم كەپىلدىك بەرەدى؟ اۋ، 2 مىڭ بەتتىك ەو شارتتارىندا "ورتاق شەكارا، ورتاق ازاماتتىق، ورتاق ۆاليۋتا تب" تۋرالى ءسوز قوزعالعاننان سوڭ، ەل ۇلارداي شۋلاماي قايتەدى؟ ەو-تان "ۇتاتىنىمىز مىناۋ، ال مىناۋ جەردە ۇتىلامىز" دەگەن سالماقتى ساراپتامالار بولدى ما؟ بيلىك تاراپىنان. جوق، بولعان جوق. ويتكەنى، ولاردىڭ ءوزى بۇل وداقتىڭ بولاشاعىنا كۇمانمەن قاراپ وتىر. التىلىق ەكەنى ايدان انىق جيرينوۆسكيي، ليمونوۆتاردىڭ داۋلى مالىمدەمەلەرىنەن كەيىن، تايچيبەكوۆ سىندى فسب-نىڭ كۇشىكتەرىنىڭ تايراڭداۋىنان سوڭ، ەلدىڭ كۇمانى ۇلعايماي نە ىستەيدى؟ الدە ءدۇيىم جۇرتتىڭ قۇدايدان تىلەپ العان تاۋەلسىزدىگى مەن ەل تاعدىرىنا الاڭداۋعا قاقى جوق پا؟ باق-تا شىنايى، وبەكتيۆتى اقپار جوق. حالىقتىڭ قالاۋىن پىسقىرمادى. سەنزۋرامەن تۇمشالاپ تاستالعان! ەندى، كوكەلەر، ەڭ قۇرعاندا الەۋمەتتىك جەلىلەردە شەر تارقاتۋعا مۇرسات بەرىڭدەر! قارا شاڭىراعىمىزدىڭ اماندىعىنا شىر-پىر بولعان ەل ۆيرتۋالدى كەڭىستىكتە ىشتەگى مۇڭىن ايتسىن، قاتىپ قالعان زاپىرانىن توكسىن، كەۋدەلەرىندە تولعان وكسىگىن باسسىن. بۇگىن ايتسا، ەرتەڭ باسىلىپ، ساباسىنا تۇسەدى. بۇگىن قىزارىپ كەشتىڭ باتاتىنىن بىلگەن ەل، تۋرا ەرتەڭ بوزارىپ تاڭ اتاتىنىن جاقسى بىلەدى. مۇنىڭ بارلىعى زاڭدى، قالىپتى، بولجانعان، بولۋعا ءتيىس رەاكسيا. وسىدان جارىلىپ جاتقان باستى، اتىلىپ جاتقان تاستى كوردىڭىزدەر مە؟ اۋەلدەن "ايتپاسا ءسوزدىڭ اتاسى ولەدى" دەيتىن قازاقپىز. تابيعاتىمىز سول. ەردەن اسپاق بولسا دا، ەلدەن اسپاق ەشكىم جوق!

(اۆتوردىڭ فەيسبۋكتەگى جازباسىنان)