ءومىر
پوەزيا، ونى پروزاعا، توزاققا اينالدىرىپ جۇرگەن ءوزىمىز… اللا تاعالا ادامداردىڭ تىلدەرىن ءار ءتۇرلى عىپ، تۇسىنىستىكپەن ايىرىپ جىبەرمەگەندە، قۇدايمەن تەڭەسپەك ويمەن بە، بالكىم اسپانداعى جۇماققا قايتا ورالۋ ءۇشىن بە ەكەن، ولار ايگىلى بابىل مۇناراسىن اسپانعا دەيىن سالىپ الار ما ەدى…
باقىت
سوقىر قۇس. سوندىقتان كىم كورىنگەننىڭ باسىنا قونادى. ءقادىرىن بىلگەن ۇيالاتادى. بىلمەگەن ۇركىتەدى. ادام بالاسى ءومىر باقي سول قۇستان كوز الماي، كۇتىپ وتەدى. باقىتتى ءوز قولىمەن جاسايمىن دەيتىندەر دە بولادى. قولدان جاسالعان نارسەنىڭ ءقادىرى بولعانمەن، قاسيەتى بولسىن با…
جالعىزدىق
جاپالىق. ورتاڭنان وقشاۋلىق. وزگە ولشەم. اينالاڭنىڭ ارزاندىعىن سەزىنۋ. بيىگىڭ ءپاس، تەرەڭىڭ سايازداعانىنا قاپا بولۋ. بۇل اقىلى بارلاردىڭ اۋرۋى، اقىلسىزدار جالعىزدىقتى سەزىنبەيدى عوي. «اقىماقتىڭ اتى ارىپ، تونى توزبايدى» دەگەندى اتام جامانقۇل راحىمەلى ءجيى ايتاتىن. الايدا جالعىزدىق اللاعا عانا جاراسقان. بىزدىكى اشەيىن پەندەشىلىك.
ماحاببات
ءمان. مازمۇن. ءومىردىڭ ءمانى مەن مازمۇنىن ايتامىن. بۇل دا ادام بالاسىنا اللانىڭ جىبەرگەن قۇدىرەتى. جالعىز ادامعا عانا ەمەس، بۇكىل جان-جانۋارعا دا دارىتىلعان سيقىر. ولار تەك ونى سەزىنە المايدى، ولارعا جۇرەك دەيتىن «جۇدىرىق» بەرىلمەگەن. ماحاببات بار جەردە اسپانداۋ، ۇشۋ بار، مۇڭدانۋ بار. ساعىنىپ، سارعايۋ بار. اھىلەپ، ۇھىلەۋ بار. اسپانداۋ دەگەن – جۇماققا جاقىنداۋ ەمەس پە؟! دەمەك، ماحاببات – جۇماققا تالپىنۋ!
سۇلۋلىق
كوزدىڭ قۇرتى. ءتان سۇلۋلىعىن ايتامىن. «سىڭعىرلاپ وڭكەي كەلىسىم» دەپ اباي حاكىم ايتقانداي، سۇلۋلىق دەگەن – نازىكتىك، مولدىرلىك، تۇزۋلىك، تازالىق، سيممەتريا، پاراللەل… ال جان سۇلۋلىعى كوكىرەگى سوقىرلارعا كورىنبەيدى. بۇلار دا اللانىڭ ءوزىنىڭ اسا ىقىلاسپەن جاراتقان پەندەسى ادامدى ەلجىرەي ءسۇيىپ، ءسۇيسىنىپ، شىن جۇرەگىمەن، ەرەكشە مەيىرلەنە جاسايتىن «شىعارماسى»، قۇدىرەتى.
قىزعانىش
قىزىل يت. دەرت. ادام بالاسىنىڭ اعزاسىنا، مەندىك ەگويزم مەن مەنشىكتىك مەنتاليتەت پايدا بولعاندا، ءىبىلىس جىبەرگەن ىندەت. توباشىلدىق بار جەردە ول يت «ۇرمەيدى دە، ىرىلدامايدى». سۇيىسپەنشىلىكتەن تۋىنداعان قىزعانىش دەپ، ادامدار ءوزدى-وزىن الدارقاتۋعا بولمايدى، دەمەك، ول سەزىم ەكەۋدىڭ بىرىندە جوق بولعانى…
تاعدىر
ادامداردىڭ وزدەرى، ءوز قولىمەن جاسايتىن تالكەگى. ءوزىڭ جاساعان نارسەگە وكپەلەۋگە بولمايدى…قوعام مەن زاماننىڭ تالكەگىندەگى تاعدىر – زاۋالدى كۇنا. ول زاۋالمەن كۇرەسىپ نەمەسە مويىنسۇنىپ شەيىت بولعانداردىڭ جانى ءجانناتتا شىعار… زاۋال جاساعاندار – توزاقتا بولار…
تاۋەلدىلىك
قۇلدىق. كەمىستىكتى مويىنداۋ. نوقتاعا كونۋشىلىك. ىنجىقتىق. تۇياق سەرىپپەۋدى ادەتكە اينالدىرۋ.
تەكتىلىك پەن ۇلىلىق
تەرەڭدىك. قاننان كەلەدى. ۇلىلىق – بيىكتىك. اللادان داريدى.
ونەردىڭ ماقساتى
ومىردەگى وتىرىكتەردەن الشاقتاتۋ. كەزدەسە بەرمەيتىن ادىلەت پەن شىندىقتىڭ اۋىلىنا جول سىلتەۋ. ادام بالاسىنىڭ بىر-بىرىنە باۋىر ەكەندىگىن كوزگە شۇقىپ ايتۋ. جۇرەكتەرىنە كوبىرەك قۇلاق اسىپ، اقىلدارىن ات تەپپەۋىن ەسكەرتۋ.
ازىرلەگەن – ءاسيا باعداۋلەت قىزى.
پىكىر قالدىرۋ